ភាពយន្តខ្លីរឿង «ទៅអត់?» ដែល ផលិតឡើងដោយសិក្ខាកាមរបស់វគ្គបណ្តុះបណ្តាលភាពយន្តខ្លីកម្ពុជាឆ្នាំ២០២៤ បានឈ្នះពានពីមហោស្រពភាពយន្តខ្នាតខ្លីកម្ពុជា ឆ្នាំ២០២៤ ។ 

ទីបំផុតមហោស្រពជាតិភាពយន្តខ្នាតខ្លីកម្ពុជាឆ្នាំ២០២៤ លើកទី៤ បានរកឃើញម្ចាស់ពានមាស ដែលជាជយលាភីលេខ១ ក្នុងមហោស្រពនេះហើយ គឺបានទៅលើភាពយន្តខ្លីរឿង «ទៅអត់?» ជាភាពយន្តខ្លីដែលផលិតឡើងដោយសិក្ខាកាមរបស់វគ្គបណ្តុះបណ្តាលភាពយន្តខ្លីកម្ពុជាឆ្នាំ២០២៤ លើកទី៧ (7th Cambodia Film Lab 2024)។ 

លោក ឆាត សីហាក់ និងកញ្ញា ហែម ចាន់ធីតា ម្ចាស់ស្នាដៃភាពយន្តខ្លី រឿង «ទៅអត់?» បានបង្ហាញអារម្មណ៍រំភើបដែលស្នាដៃភាពយន្តខ្លីដំបូងបង្អស់របស់ខ្លួនបានឈ្នះជយលាភីលេខ ១ ក្នុងមហោស្រពជាតិភាពយន្តខ្នាតខ្លីកម្ពុជាឆ្នាំ២០២៤។ យុវសមិទ្ធិករទាំង ២រូប ពុំនឹកស្មានថា ភាពយន្តខ្លីរបស់ខ្លួនអាចដណ្តើមបានពានមាសនោះឡើយ។

ក្រោយឈ្នះពានមាសពីមហោស្រពជាតិភាពយន្តខ្នាតខ្លីកម្ពុជាឆ្នាំ២០២៤ ផលិតករវ័យក្មេងទាំង ២រូប កាន់តែមានកម្លាំងចិត្តក្នុងការសិក្សាស្វែងយល់ពីវិស័យភាពយន្ត ដើម្បីបន្តផលិតភាពយន្តថ្មីៗ ឆ្ពោះទៅការផលិតភាពយន្តខ្នាតធំនាពេលអនាគត។

ក្នុងនោះផងដែរ អ្នកទាំងពីរក៏មិនភ្លេចអរគុណទៅដល់លោកគ្រូអ្នកគ្រូ និង Cambodia Film Lab 2024 ដែលបានបង្ហាត់បង្រៀនកូនសិស្សយ៉ាងយកចិត្តទុកដាក់ ទើបអ្នកទាំងពីរអាចមានឱកាសបង្កើតស្នាដៃភាពយន្តខ្លីមួយនេះ រហូតឈ្នះជយលាភីលេខ១ ពីមហោស្រពនាឆ្នាំនេះ។

សូមជម្រាបថា មហោស្រពជាតិភាពយន្តខ្នាតខ្លីកម្ពុជាឆ្នាំ២០២៤ មានពានរង្វាន់ធំចំនួន ៤ និងរង្វាន់លើកទឹកចិត្តចំនួន ៩ ផ្សេងទៀត៕

អត្ថបទ៖ រ៉ាត់ ចាន់ធីតា រូបភាព៖ ឃាង ទូច