ថ្វីដ្បិតតែជាបេក្ខភាពតំណាងកម្ពុជាដំបូងគេបង្អស់ក្នុងការប្រកួត Man Hot Star International 2024 តែកំលោះសង្ហា ហ៊ុយ យ៉ាន់ហ្វី ហៅ យ៉ារ៉ា ពុំមានភាពភ័យខ្លាចឡើយ ផ្ទុយទៅវិញលោកមានជំនឿចិត្តខ្ពស់ក្នុងការបញ្ចេញសមត្ថភាព ដើម្បីដណ្តើមជយលាភីពីឆាកអន្តរជាតិ។

បុរសឯក ហ៊ុយ យ៉ាន់ហ្វី ហៅ យ៉ារ៉ា ដែលត្រូវបានជ្រើសតាំងជា Man Hot Star Cambodia 2024 ដើម្បីតំណាងកម្ពុជាទៅចូលរួមប្រកួតកម្មវិធីអន្តរជាតិដ៏ធំនេះបានបង្ហាញការតាំងចិត្តខ្ពស់ថានឹងធ្វើអោយល្អបំផុតមិនអោយអ្នកគាំទ្រខកបំណងទេ។

តួយ៉ាង នាព្រឹកមិញនេះ យ៉ារ៉ា បានធ្វើដំណើរចាកចេញពីកកម្ពុជាឆ្ពោះទៅប្រទេសថៃ ដើម្បីចូលរួមប្រកួតកម្មវិធី Man Hot Star International 2024 ហើយ។ បេក្ខភាពតំណាងកម្ពុជារូបនេះ មានភាពជឿជាក់ខ្ពស់ក្នុងការប្រកួតប្រជែងជាមួយបេក្ខភាពមកពី ២០ប្រទេសផ្សេងទៀត។ស្របជាមួយការនាំយកទង់ជាតិកម្ពុជាទៅបង្ហាញលើឆាកអន្តរជាតិ យ៉ារ៉ា ក៏បានឱ្យដឹងការត្រៀមខ្លួន និងក្តីរពឹងរបស់លោកផងដែរ។
 

 
សូមជម្រាបផងដែរថា នេះជាលើកដំបូងបង្អស់ដែល យ៉ារ៉ា ចាប់អារម្មណ៍ចូលប្រកួតកម្មវិធីបុរសឯក ហើយលោកសប្បាយចិត្តដែលក្តីស្រមៃមួយទៀតរបស់លោកក្លាយជាការពិត គឺការដែលបានតំណាងប្រទេសកម្ពុជាទៅប្រកួតលើឆាកអន្តរជាតិ។ លោកប្តេជ្ញាថា នឹងបញ្ចេញឱ្យអស់ពីសមត្ថភាព រួមទាំងទេពកោសល្យពិសេស ដើម្បីដណ្តើមជយលាភីពីឆាកអន្តរជាតិត្រឡប់មកកម្ពុជាវិញ។

អត្ថបទ៖ រ៉ាត់ ចាន់ធីតា រូបភាព៖ ឃាង ទូច និងផ្តល់ឱ្យ