ស៊េរីរឿងភាគអំពីហ្គេមដាក់ជីវិតដ៏ល្បីរបស់កូរ៉េខាងត្បូងគឺ “Squid Game” ទើបតែបញ្ចេញ Trailer ផ្លូវការសម្រាប់រដូវកាលថ្មី មុនចេញផ្សាយនៅខែក្រោយ។ក្រុមហ៊ុន Netflix ទើបតែបញ្ចេញវីដេអូ Trailer ក្តៅគគុកសម្រាប់រដូវកាលទី ២ នៃរឿងភាគ "Squid Game" រយៈពេលមួយខែមុនការវិលត្រឡប់មកវិញនៃស៊េរីរឿងភាគដ៏ល្បីមួយនេះ។

ផ្ដល់បទសម្ភាសជាមួយសារព័ត៌មានរ៉យទ័រកាលពីខែមុន ផលិតករពីក្រោយរឿងភាគទូរទស្សន៍មួយនេះ គឺលោក Hwang Dong-hyuk (វ៉ាង ដុងយុក) បាននិយាយថា រដូវកាលថ្មីនេះនឹងបង្ហាញពីការត្រលប់មកសងសឹករបស់តួអង្គ ថែមទាំងអះអាងថានឹងមានតួអង្គធំៗច្រើនជាងមុន ខណៈការប្រកួតប្រជែងក៏នឹងមានភាពទាក់ទាញជាងរដូវកាលមុនផងដែរ។

សូមរំឭកថា រដូវកាលដំបូងនៃ "Squid Game" បានក្លាយជាស៊េរីដែលមានអ្នកទស្សនាច្រើនបំផុតក្នុងប្រវត្តិសាស្ត្ររបស់ Netflix នៅពេលចេញផ្សាយក្នុងឆ្នាំ ២០២១។ភាពជោគជ័យនៃរឿងនេះបានធ្វើឱ្យលោក Hwang Dong-hyuk (វ៉ាង ដុងយុក) ដែលជាអ្នកនិពន្ធនិងដឹកនាំរឿងផ្ទាល់បានទទួលពានរង្វាន់ពីកម្មវិធីពានរង្វាន់កម្មវិធីទូរទស្សន៍អាមេរិក Emmy Awards សម្រាប់ការដឹកនាំឆ្នើម ខណៈតួឯកប្រុសគឺតារាសម្ដែងកូរ៉េ Lee Jung-jae (លី ជុងចេ) បានទទួលពានរង្វាន់តួឯកប្រុសឆ្នើម។

អ្នកទាំងពីរបានក្លាយជាជនជាតិអាស៊ីដំបូង និងជាលើកដំបូងផងដែរសម្រាប់រឿងភាគមិនមែនជាភាសាអង់គ្លេសដែលអាចឈ្នះពានពីកម្មវិធីនេះ។ដោយទទួលបានការគាំទ្រខ្លាំង ក្រុមហ៊ុន Netflix ក៏មិនអែអង់ក្នុងការផលិតរដូវកាលបន្តនោះឡើយ ខណៈ “Squid Game” រដូវកាលទី២ ត្រៀមនឹងចេញផ្សាយនៅថ្ងៃទី២៦ ខែធ្នូខាងមុខនេះ ហើយរដូវកាលទី៣ ដែលជារដូវកាលចុងក្រោយគ្រោងនឹងចេញផ្សាយនៅឆ្នាំ២០២៥ ៕

ប្រែសម្រួល៖ វ៉ាន់ថន