បវរកញ្ញាឥណ្ឌូនេស៊ី Shaquila Keisha រំភើបចិត្តជាខ្លាំង ពេលត្រូវជ្រើសរើសជាតួអង្គសំខាន់ក្នុងរឿងខ្នាតអន្តរជាតិលើកដំបូង ហើយត្រូវស្នាក់នៅទឹកដីកម្ពុជា ដើម្បីថតទៀតផង។

កាលពីពេលថ្មីៗកន្លងទៅនេះ លោក អ៊ិន វិចិត្រ ស្ថាបនិកមេឌៀលោត បានបើកកាមេរ៉ាចេញថតខ្សែភាពយន្តខ្នាតធំចំនួន ២ រួមមាន៖ «ព្រាយបំពេរកូន» និង «ម្ចាស់កញ្ចក់» ដែលរឿង ម្ចាស់កញ្ចក់ ជាខ្សែភាពយន្តខ្នាតអន្តរជាតិដំបូងរបស់ មេឌៀលោត ដែលមានការចូលរួមសម្តែងរួមគ្នាលើករវាងបវរកញ្ញាវ័យក្មេងកម្ពុជា ល្អ ហួស , លី មួយលាង និងបវរកញ្ញាឥណ្ឌូនេស៊ី Shaquila Keisha (ហ្សាគីឡា គីហ្សា)។

ក្នុងពិធីក្រុងពាលីចេញថត ម្ចាស់មកុដ Miss Pre -Teen Junior Idol Word 2024 និង ម្ចាស់មកុដ Miss Teen International 2024 បានបង្ហាញអារម្មណ៍រំភើបរីករាយ ខណៈដែល Shaquila Keisha (ហ្សាគីឡា គីហ្សា) រំភើបចិត្តជាខ្លាំង ពេលត្រូវជ្រើសរើសជាតួអង្គសំខាន់ក្នុងរឿងខ្នាតអន្តរជាតិលើកដំបូង ហើយត្រូវស្នាក់នៅទឹកដីកម្ពុជា ដើម្បីថតរឿងទៀតផង។ 

បកប្រែសម្លេង ០១៖ «សួស្តីអ្នកទាំងអស់គ្នា! ខ្ញុំឈ្មោះ ហ្សាគីឡា គីហ្សា គ្រប់គ្នាអាចហៅខ្ញុំថា ហ្សាគីឡា ខ្ញុំជា Miss Teen Icon International 2024។ ពេលនេះខ្ញុំចូលរួមសម្តែងក្នុងរឿងមួយរបស់ លោកពូ វិចិត្រ ចំណងជើង ម្ចាស់កញ្ចក់ អ្នកទាំងអស់គ្នាគួរតែទស្សនា។

វាជាភាពយន្តបែបរន្ធត់ ហើយមែនទែនទៅ នេះជាភាពយន្តរន្ធត់ទី១របស់ខ្ញុំ ជាភាពយន្តលក្ខណៈអន្តរជាតិសម្រាប់កម្ពុជា ហើយខ្ញុំពិតជាសប្បាយចិត្តដែលបានសម្តែងជាមួយ យ៉ាយ៉ា និង មួយលាង ផងដែរ។ ខ្ញុំពិតជារំភើបខ្លាំងណាស់ ហើយសង្ឃឹមថា រឿងនេះនឹងផ្ទុះការគាំទ្រខ្លាំង ហើយគ្រប់គ្នានឹងចូលចិត្តវា»។

Miss Teen Icon International 2024 អះអាងថា នឹងខំប្រឹងប្រែងបញ្ចេញឱ្យអស់ពីសមត្ថភាព ឱ្យរឿងនេះចេញមកល្អ ថែមទាំងផ្តាំឱ្យគ្រប់គ្នារង់ចាំតាមដានស្នាដៃភាពយន្តខ្នាតធំលើកដំបូងរបស់នាងទៀតផង៕

បកប្រែសម្លេង ០២៖ «ពិតណាស់ ខ្ញុំនឹងពង្រឹងការសមត្ថភាពឱ្យល្អជាងនេះ ហើយខ្ញុំនឹងព្យាយាមដាក់អារម្មណ៍តាមរឿងសាច់រឿងនេះ ដូច្នេះខ្ញុំនឹងអាចចូលតួតាមតួអង្គនោះឱ្យបាន។ ខ្ញុំរំភើបខ្លាំងៗដែលបានសម្តែងតួអង្គដល់ទៅ២ មនុស្ស និងខ្មោច។ ខ្ញុំសង្ឃឹមថា ខ្ញុំនឹងសម្តែងតួអង្គនេះបានល្អ ... ត្រៀមខ្លួន ខ្ញុំនឹងចេញលងអ្នកទាំងអស់គ្នាឆាប់ៗនេះ!»៕

 អត្ថបទ៖ រ៉ាត់ ចាន់ធីតា រូបភាព៖ ឃាង ទូច