បាត់មុខពីពិភពសម្តែងអស់ពេលជាច្រើនឆ្នាំ តារាសម្តែងទឹកភ្នែក នី មុន្នីនាថ បានងាកមកផលិតវិដេអូ ទាក់ទងនិងល្ខោនយីកេ ល្ខោនបាសាក់ និង ល្ខោននិយាយ ដើម្បីពង្រឹងវប្បធម៌ដែលកំពុងប្រឈមបាត់បង់ ។ 

តារាទឹកភ្នែក នី មុន្នីនាថ បានផ្អាកពីអាជីពសម្តែងអស់ពេលជាច្រើនឆ្នាំហើយ ដោយនាងបានសម្រេចចិត្តងាកមកចាប់អាជីពរកស៊ី និងផលិតវិដេអូទាក់ទងនិងល្ខោនយីកេ ល្ខោននិយាយ និង ល្ខោនបាសាក់ ដើម្បីឱ្យបងប្អូនងាកមកចាប់អារម្មណ៍វប្បធម៌ដើមវិញ ខណៈសិល្បៈបុរាណទាំងនេះកំពុងប្រឈមបាត់បង់ពីមួយថ្ងៃទៅមួយថ្ងៃ ។ 

កញ្ញា ធ្លាប់ជាតារាសម្តែងល្បីមួយរូបដែលទទួលបានការចាប់អារម្មណ៍ខ្លាំងពីមហាជនកាលពីប៉ុន្មានឆ្នាំមុន ប៉ុន្តែនៅសុខៗនាងស្រាប់តែបោះបង់អាជីពនេះចោល ដោយសំងំកើបលុយក្នុងការងាររកស៊ីជំនួសវិញ ។

 អ្វីដែលកាន់តែគួរឱ្យចាប់អារម្មណ៍នៅក្នុងពេលនេះគឺនាងបានងាកមកផលិតវិដេអូអប់រំខ្លីៗ ក៏ដូចជាផលិតវិដេអូទាក់ទងនិងល្ខោនយីកេ ល្ខោនបាសាក់ និងល្ខោននិយាយជាដើម ។ ជុំវិញនៃការផលិតវិដេអូនេះ ត្រូវបានតារាស្រី នី មុន្នីននាថ បញ្ជាក់ប្រាប់ថា នាងចង់ពង្រឹងវិស័យល្ខោននៅក្នុងស្រុក ខ្មែរ ឡើងវិញដើម្បីឱ្យមានការចាប់អារម្មណ៍ពីមហាជន ។ 

ជាមួយនិងការបោះបង់អាជីពសម្តែងនេះចោល នី មុន្នីនាថ ក៏បានបើកសាលាបង្ហាត់បង្រៀនក្មេងៗដែលចង់ហាត់របាំ ខ្មែរ ផងដែរ ពីព្រោះនាងក៏ជាអតីតនាដការីរបាំបុរាណដ៏ល្បីឈ្មោះដែលបានសិក្សាផ្នែករបាំអស់ពេលជាង ២០ ឆ្នាំមកហើយ ។  

រយៈពេលជាង ២ ឆ្នាំមកហើយដែល កញ្ញា នី មុន្នីនាថ បានបោះបង់អាជីពសម្តែងចោល រហូតធ្វើឱ្យមហាជនជាច្រើនគិតថា នាងបានរៀបការនិងរស់នៅយ៉ាងមានក្តីសុខទៅហើយ ទើបមិនខ្វល់ពីអាជីពនេះទៀត តែទោះជាយ៉ាងនេះក្តី នី មុន្នីនាថ នៅតែអះអាងថា នាងពុំទាន់រៀបការមានគ្រួសារនៅឡើយទេ នាងនៅតែស្រឡាញ់អាជីពសម្តែង ថ្ងៃណាមួយនាងនឹងវិលត្រឡប់មកកាន់វិស័យសម្តែងវិញ មិនថាស្ថិតក្នុងតំណែងបែបណានាងរីករាយនិងថតដូចដើម...៕  

អត្ថបទ ៖ ម៉ា រីសា រូបភាព ៖ ញិល សុជា