ថ្ងៃពុធ ទី២២ ខែឧសភា ឆ្នាំ២០២៤

ចិននិយាយថា ការពង្រឹងទំនាក់ទំនងយោធារវាងអាមេរិកនិងតៃវ៉ាន់នឹងបង្កើនភាពតានតឹងកាន់តែខ្លាំង

អ្នកនាំពាក្យក្រសួងការបរទេសចិនលោក វ៉ាង វិនប៊ីន បាននិយាយកាលពីថ្ងៃពុធថា ការពង្រឹងការឃុបឃិតផ្នែកយោធារវាងសហរដ្ឋអាមេរិក និងកោះតៃវ៉ាន់នឹងបង្កើនភាពតានតឹង និងហានិភ័យនៃជម្លោះនៅក្នុងច្រកសមុទ្រតៃវ៉ាន់។

 

 

 

 

លោក វិនប៊ីន បានប្រាប់អាមេរិកតាមរយៈសន្និសីទសារព័ត៌មានក្នុងទីក្រុងប៉េកាំងកាលពីថ្ងៃពុធថា ការពង្រឹងការឃុបឃិតផ្នែកយោធារវាងសហរដ្ឋអាមេរិក និងតៃវ៉ាន់នឹងមិននាំមកនូវសន្តិសុខទេ។

 

លោកបានបន្ថែមថា អាមេរិកមិនអាចជួយសង្គ្រោះតៃវ៉ាន់តាមរយៈជោគវាសនានៃការប្រកាសឯករាជ្យបានទេ ព្រោះទង្វើនេះគឺមានតែរុញភាពតានតឹង និងហានិភ័យនៃជម្លោះនិងការប្រឈមមុខដាក់គ្នានៅច្រក    សមុទ្រតៃវ៉ាន់កាន់តែខ្លាំងឡើង ហើយទីបំផុតវានឹងនាំទុក្ខលំបាកដល់ខ្លួនឯងតែប៉ុណ្ណោះ។

 

ការបញ្ជាក់របស់ចិននេះបានធ្វើឡើងចំពេលរដ្ឋមន្ត្រីការបរទេសអាមេរិកលោក អេនថូនី ប្ល៊ីនខិន កំពុងធ្វើទស្សនកិច្ចនៅទីក្រុងស៊ាងហៃដើម្បីជួបជាមួយនឹងមេដឹកនាំធុរកិច្ចមុនពេលចេញដំណើរទៅកាន់ទីក្រុងប៉េកាំង នៅថ្ងៃសុក្រសប្ដាហ៍នេះដើម្បីពិភាក្សាជាមួយនឹងសមភាគីចិនលោក វ៉ាង យី និងទំនងជាមានកិច្ចប្រជុំជាមួយនឹងប្រធានាធិបតីចិនលោក ស៊ី ជីនពីង ផងដែរ។

 

ការបញ្ជាក់របស់ចិននេះទៀតសោតបានធ្វើឡើងបន្ទាប់ពីសភារបស់សហរដ្ឋអាមេរិកបានអនុម័តច្បាស់ស្ដីពីថវិកាជំនួយ ដែលលោក ចូ បៃដិន ប្រធានាធិបតីអាមេរិកទើបតែបានចុះហត្ថលេខាឱ្យចូលជាធរមានកាលពីថ្ងៃពុធដើម្បីផ្ដល់មូលនិធិថ្មីរាប់ពាន់លានដុល្លារសម្រាប់កោះតៃវ៉ាន់ផងដែរ៕

 

 

 

 

 

ប្រែសម្រួល៖ ប៉ិច ស៊ីនួន

ព័ត៌មានដែលទាក់ទង

© រក្សា​សិទ្ធិ​គ្រប់​យ៉ាង​ដោយ​ PNN ប៉ុស្ថិ៍លេខ៥៦ ឆ្នាំ 2024