អាជ្ញាធរអគ្គិសនីកម្ពុជា បានកំណត់បញ្ជីថ្លៃបញ្ចូលថាមពល ឱ្យអ្នកកាន់អាជ្ញាបណ្ណធ្វើសេវាកម្មបញ្ចូលថាមពលយានយន្តអគ្គិសនី សម្រាប់ការបញ្ចូលថាមពលឱ្យអ្នកប្រើប្រាស់យានយន្តអគ្គិសនី តាមប្រភេទនៃការបញ្ចូលថាមពល ដូចខាងក្រោម៖ ការបញ្ចូលថាមពលតាមចរន្តឆ្លាស់ AC ( អាសេ ) ថ្លៃ ១០៥០រៀល ក្នុង ១គីឡូវ៉ាត់ម៉ោង។ ចំណែកការបញ្ចូលថាមពលតាមចរន្តជាប់ DC ( ដេសេ ) ថ្លៃ ១៣៥០រៀល ក្នុង ១គីឡូវ៉ាត់ម៉ោង។

សេចក្តីសម្រេច ស្តីពី ការកំណត់បញ្ជីថ្លៃបញ្ចូលថាមពល សម្រាប់ស្ថានីយបញ្ចូលថាមពលយានយន្តអគ្គិសនី នៅកម្ពុជា ដែលចុះហត្ថលេខាដោយលោក យឹម វិសិដ្ឋ ប្រធានអាជ្ញាធរអគ្គិសនីកម្ពុជា ក៏បានកំណត់ថា បញ្ជីថ្លៃបញ្ចូលថាមពល ដែលកំណត់ខាងលើនេះ គឺជាបញ្ជីថ្លៃអតិបរមា។ អ្នកកាន់អាជ្ញាបណ្ណ អាចអនុវត្តអត្រាថ្លៃបញ្ចូលថាមពលទាបជាងកម្រិតថ្លៃអតិបរមាបាន។

អ្នកកាន់អាជ្ញាបណ្ណ ធ្វើសេវាកម្មបញ្ចូលថាមពល និងអ្នកប្រើប្រាស់យានយន្តអគ្គិសនី ត្រូវអនុវត្តបញ្ជីថ្លៃបញ្ចូលថាមពលនេះ ឱ្យមានប្រសិទ្ធភាព។ អ្នកកាន់អាជ្ញាបណ្ណ ធ្វើសេវាកម្មបញ្ចូលថាមពលយានយន្តអគ្គិសនី មានភារកិច្ចផ្សព្វផ្សាយខ្លឹមសារសេចក្តីសម្រេចនេះ។ សេចក្តីសម្រេចនេះ ត្រូវចូលជាធរមាន ចាប់ពីថ្ងៃចុះហត្ថលេខា នាថ្ងៃទី៧ ខែកក្កដា ឆ្នាំ២០២៥ នេះ រហូតដល់មានការកែសម្រួលឡើងវិញ ដោយអាជ្ញាធរអគ្គិសនីកម្ពុជា៕
 

អត្ថបទ និងរូបភាព៖ PNN