ផ្អឹបទុកអស់រយៈពេលប្រមាណ ៤ឆ្នាំ តារាជើងចាស់ អ្នកស្រី សរ កេសារា ចាងហ្វាងផលិតកម្ម កេសារាភាពយន្ត ដាច់ចិត្តទម្លាក់ស្នាដៃរឿង «១៥រោច» មកចាក់បញ្ជាំងគ្រប់រោងភាពយន្ត ចាប់ពីថ្ងៃទី២៣នេះតទៅ។នៅទីបំផុតតារាជើងចាស់អ្នកស្រី សរ កេសារា ចាងហ្វាងផលិតកម្ម កេសារាភាពយន្ត ដាច់ចិត្តទម្លាក់ស្នាដៃរឿងខ្នាតធំថ្មី ចំណងជើង «១៥រោច» នៅគ្រប់រោងភាពយន្តទូទាំងប្រទេសកម្ពុជាហើយ ក្រោយផ្អឹបរឿងនេះទុកអស់រយៈពេលប្រមាណ ៤ឆ្នាំរួចមក។

ផ្តល់កិច្ចសម្ភាសន៍ក្នុងថ្ងៃ Pre-screening រឿង «១៥រោច» នៅរោងភាពយន្ត Major Cineplex សាខា សូរិយា អ្នកស្រី បានសម្តែងក្តីរំភើបសម្រាប់ការពាំនាំយកស្នាដៃរឿងថ្មីមួយនេះមកកាន់ទីផ្សារភាពយន្តកម្ពុជានៅពេលនេះ។ ទោះបីរឿងនេះផលិតឡើងច្រើនឆ្នាំមកហើយក៏ពិតមែន ប៉ុន្តែអ្នកស្រីជឿជាក់ថា សាច់រឿងនេះនៅតែល្អអាចបម្រើចំណីចក្ខុទស្សនិកជនបាន ព្រោះវាមានបង្កប់អត្ថន័យអប់រំច្រើន ពាក់ព័ន្ធជីវិតគ្រួសារ និងការដឹងគុណញាតិសណ្តាន។ មិនតែប៉ុណ្ណោះ រឿងនេះក៏មានលាយឡំភាពរន្ធត់តិចតួចផងដែរ ដែលនឹងកើតឡើងនៅរៀងរាល់ថ្ងៃ ១៥រោច ដូចទៅនឹងចំណងជើងរឿងនេះតែម្តង។

ត្រង់ៗមិនលាក់លៀម ចាងហ្វាងផលិតកម្មរូបនេះថា អ្នកស្រីមិនសូវរំពឹងថា ស្នាដៃរឿង «១៥រោច» នឹងផ្ទុះការគាំទ្រខ្លាំងសម្រាប់ទីផ្សារក្នុងស្រុកទេ ព្រោះសាច់រឿងនេះផលិតឡើងតម្រូវសម្រាប់មនុស្សរៀងចាស់ទុំ ឬមនុស្សវ័យកណ្តាលជាដើម។ ដោយសារចិត្តស្រលាញ់និងមើលឃើញថា រឿងនេះអាចផ្តល់គុណតម្លៃ និងជួយបណ្តុះគំនិតដល់អ្នកទស្សនាបានច្រើន ទើបអ្នកស្រី សរ កេសារា មានគម្រោងនាំរឿង «១៥រោច» នេះ ចេញទៅចាក់បញ្ចាំងនៅក្រៅប្រទេស ដោយគោលដៅដំបូងនៃការចាក់បញ្ចាំងរឿងនេះ គឺ សហរដ្ឋអាមេរិក ដោយសារទីនោះជាកន្លែងដែលអ្នកស្រីរស់នៅតែម្តង។

តារាជើងចាស់ សរ កេសារា ប្រហែលមិនបន្តផលិតភាពយន្តបន្តទៀតនោះទេ ដោយអ្នកស្រីចង់ទុកឱកាសឱ្យក្មេងៗជំនាន់ក្រោយដែលមានសមត្ថភាពខ្ពស់ អាចបញ្ចេញសមត្ថភាពរបស់ពួកគេក្នុងការផលិតភាពយន្តខ្មែរប្រកបដោយគុណភាព។ ប៉ុន្តែ អ្នកស្រីមានគម្រោងការងារផ្សេងៗ រួមទាំងគ្រោងការជួយនាំយកសិល្បករ-សិល្បការនីក្នុងស្រុកចេញទៅចម្រៀងសម្តែងនៅឯនាយសមុទ្រផងដែរ គ្រាន់តែពេលនេះគម្រោងការនោះ ស្ថិតក្នុងការពិភាក្សានៅឡើយ៕

អត្ថបទ៖ រ៉ាត់ ចាន់ធីតា រូបភាព៖ ផ្តល់ឱ្យ និងហ្វេសប៊ុក