ប៉ះគ្នាលើកដំបូងក្នុងខ្សែភាពយន្ត «ប៉ាកូរចង់បានប្រពន្ធ» តារាស្រីល្បីឈ្មោះលំដាប់ប្រទេស ស៊ីន យូប៊ីន និងតារាភាពយន្តជើងចាស់ ទេព រិន្ទដារ៉ូ ផ្តាំហ្វេនថា បើមិនចង់ស្តាយក្រោយ ដាច់ខាតកុំឱ្យរំលងរឿង «ប៉ាកូរចង់បានប្រពន្ធ» នេះ ព្រោះក្បួនញ៉ែក្នុងរឿងនេះ នឹងធ្វើឱ្យលោកអ្នកសើចគាំងតែម្តង។

ផលិតកម្ម LD Entertainment ដែលជាផលិតកម្មឈានមុខគេក្នុងការផលិតរឿងខ្មែរ កាលពីចុងសប្តាហ៍កន្លងទៅ បានសម្ភោធចាក់បញ្ចាំងស្នាដៃភាពយន្តថ្មីមួយ ចំណងជើងថា «ប៉ាកូរចង់បានប្រពន្ធ» ឬ « Single Dad 2» ដែលជារឿងស៊េរីបន្តពីរឿង «លោកប៉ាមហាកូរ»។ 

ពិធីសម្ភោធរឿង «ប៉ាកូរចង់បានប្រពន្ធ» ត្រូវបានប្រារព្ធឡើងយ៉ាងអធិកអធម នៅបរិវេនផ្សារទំនើបជីបម៉ុង ២៧១ មេហ្គាម៉ល ដោយមានការចូលរួមពីសិល្បករ-សិល្បការនីប្រុសស្រីល្បីៗជាច្រើនរូប រួមទាំងតារាសម្តែងល្បីឈ្មោះពីប្រទេស មីយ៉ាន់ម៉ា លោក Paing Takhon ផងដែរ។

លោក លៀក លីណា អ្នក​គ្រប់គ្រង ​និង​ចាត់ការ​ទូទៅ​ក្នុង​ផលិតកម្ម​ LD Entertainment បានឱ្យដឹងថា យើងអាចបន្តផលិតរឿងវគ្គ២បាន ទល់តែយើងទទួលបានជោគជ័យលើការផលិតវគ្គ ១។ 

ជាក់ស្តែង រឿង «លោកប៉ាមហាកូរ» ពិតជាទទួលបានការគាំទ្រខ្លាំងមែនទែន ទើបយើងបង្កើតឱ្យសាច់រឿងវគ្គ២ គឺ «ប៉ាកូរចង់បានប្រពន្ធ» ដែលវគ្គនេះ កូនត្រូវតបស្នងសងគុណ មើលថែទាំ និងបំពេញបំណងឪពុកវិញម្តង។

អ្នក​គ្រប់គ្រងរូបនេះអះអាងថា សាច់រឿងវគ្គ២នេះល្អមើលមិនចាញ់វគ្គ១នោះឡើយ ព្រោះទូទៅ យើងមិនអាចធ្វើរឿងវគ្គ២ឱ្យអន់ជាងវគ្គ១ឡើយ ពោលផលិតកម្មមានតែប្រឹងពង្រឹងគុណភាពរឿងឱ្យកាន់តែល្អសម្រាប់អ្នកទស្សនា។

ក្នុងរាត្រីដ៏ពិសេសនេះ តារាសម្តែងជើងចាស់ ទេព រិន្ទដារ៉ូ និងតារាស្រីល្បីឈ្មោះលំដាប់ប្រទេស ស៊ីន យូប៊ីន ក៏បានបង្ហាញអារម្មណ៍រំភើប ដែលស្នាដៃរឿងថ្មីនេះបានកំពុងត្រៀមចាក់បញ្ចាំងតាមរោងភាពយន្តទំនើបនានានៅចុងសប្តាហ៍នេះ។

យូប៊ីន ធានាថា រឿងនេះពិតជារសជាតិថ្មីប្លែកមិនធ្លាប់មាន ហើយអ្វីដែលសំខាន់នោះគឺ តួអង្គ ពូរ៉ូ មានក្បួនក្បាច់ញ៉ែច្រើនខ្លាំងណាស់ ដែលនឹងធ្វើឱ្យគ្រប់គ្នាសើចរឹងថ្គាមតែម្តង។ រីឯ ពូរ៉ូ តួអង្គតៃកុងឡាន ក៏បានសរសើរថ្វីដៃសម្តែងរបស់ យូប៊ីន ក្នុងរឿងនេះដូចគ្នា ដូច្នេះទស្សនិកជនមិនគួរខកខានរឿង «ប៉ាកូរចង់បានប្រពន្ធ» ដាច់ខាត។

ក្រៅពី កញ្ញា ស៊ីន យូប៊ីន និង លោក ទេព រិន្ទដារ៉ូ ក៏នៅមានតួអង្គសំខាន់ៗជាច្រើនទៀតដែលនឹងមកញ៉ាំងឱ្យសាច់រឿងនេះកាន់តែជក់ចិត្ដដិតអារម្មណ៍ រួមមាន៖ លោក លឹម ជាឡាយ កញ្ញា ហេង ចន្ថា កំលោះសង្ហា ប្រុស ខួច លោក អ៊ុំ សុវណ្ណគីរី និងតារាសម្តែងជាច្រើននាក់ផ្សេងទៀត។សូមជម្រាបថា រឿង «ប៉ាកូរចង់បានប្រពន្ធ» នឹងចាក់បញ្ចាំងនៅគ្រប់រោងភាពយន្តទាំងអស់ ចាប់ពីថ្ងៃទី០៧ ខែកញ្ញា ឆ្នាំ២០២៣តទៅ៕

អត្ថបទ៖ រ៉ាត់ ចាន់ធីតា រូបភាព៖ ឃាង ទូច