កូនសិស្សជាង២០រូបរបស់អ្នកច្នៃម៉ូដល្បីឈ្មោះ អូលីវ៉ា គង់ បានដឹកនាំកូនសិស្សក្មេងៗប្រមាណ ២០នាក់ទៅដើរបង្ហាញម៉ូដនៅប្រទេស វៀតណាម។ការទន្ទឹងរង់ចាំបានមកដល់ហើយ អ្នកច្នៃម៉ូដល្បីឈ្មោះ និងជាគ្រូបង្រៀនដើរ Catwalk លោក ម៉ែន សីហា ហៅ អូលីវ៉ា គង់ បានដឹកនាំកូនសិស្សជាង២០រូបទៅដើរបង្ហាញម៉ូដកម្មវិធី Vietnam International Junior Fashion Week នៅ​សារមន្ទីរ​​ក្រុង​ហាណូយ ប្រទេសវៀតណាម នៅ​ថ្ងៃ​ទី​៥-៦ ខែ​សីហា ខាងមុខនេះ។ 

តួយ៉ាង កាលពីរសៀលថ្ងៃទី ៣ ខែ សីហា ឆ្នាំ២០២៣ ម្សិលមិញ អូលីវ៉ា និងកូនសិស្សជាង២០នាក់ បានធ្វើដំណើរឆ្ពោះទៅប្រទេសវៀតណាមត្រៀមសម្រាប់ការដើរម៉ូដលើឆាកអន្តរជាតិនេះហើយ។ 

មិនខុសពីកូនសិស្សប៉ុន្មានឡើយ គ្រូបង្រៀនដើរ Catwalk ក៏ល្បី អូលីវ៉ា គង់ ឯណោះវិញ បានបង្ហាញមោទនភាពខ្លាំងដែលមានឱកាសបានដឹកនាំកូនសិស្សទៅដើរបង្ហាញម៉ូដលើឆាកអន្តរជាតិជាលើកដំបូងនេះ។

លោកជឿជាក់ថា កូនសិស្សដែលលោកជ្រើសរើសយកទៅដើរបង្ហាញម៉ូដនេះនឹងធ្វើបានល្អសម្រាប់ការដើរម៉ូដឆាកអន្តរជាតិលើកដំបូងនេះ ហើយឈុតសម្លៀកបំពាក់ដែលច្នៃយកទៅដើរបង្ហាញក៏ប្រណីតខ្លាំង ជា Concept ថ្មីប្លែក ដែលទទួលគំនិតបំផុតពីឈុតកូនក្រមុំ។

អ្នកច្នៃម៉ូដល្បីឈ្មោះនេះបង្ហើបឱ្យដឹងថា ឈុតសម្លៀកបំពាក់ដែលលោកច្នៃឱ្យ តារាចម្រៀង នីគីនីគី សម្រាប់ដើ់របង្ហាញក្នុង Vietnam International Junior Fashion Week ពិតជាប្លែកអស្ចារ្យខ្លាំងណាស់ បើនិយាយពីទម្ងន់គឺធ្ងន់ជាឈុត ទេពអប្សររំដួលបរមវិស្ណុលោក ច្នៃឡើងពីស្បែកគោ ដែលតារាចម្រៀងឯករាជ្យ នីគី បានដើរបង្ហាញក្នុងព្រឹត្តិការណ៍ការដើរបង្ហាញម៉ូដសំលៀកបំពាក់បែបសហសម័យតាមសម័យកាលរបស់ប្រទេសកម្ពុជា។

ប៉ុន្តែយ៉ាងណា តារាចម្រៀង នីគីនីគី រំភើបណាស់ដែលត្រូវបានជ្រើសរើសជាម៉ូដែលម្នាក់ឱ្យចូលរួមដើរបង្ហាញម៉ូដនៅវៀតណាមលើកនេះ។ នាងប្តេជ្ញាធ្វើឱ្យបានល្អអស់ពីសមត្ថភាព ដើម្បីបង្ហាញឱ្យអ្នកចូលរួមឃើញពីសមត្ថភាពដើរម៉ូដរបស់កូនខ្មែរ ក៏ដូចជាឈុតសម្លៀកបំពាក់ច្នៃឡើងដោយ designer ខ្មែរយើងផងដែរ។

សូមជម្រាបថា កម្មវិធី Vietnam International Junior Fashion Week នឹងប្រារព្ធឡើងនៅ​សារមន្ទីរ​​ក្រុង​ហាណូយ ប្រទេសវៀតណាម នៅ​ថ្ងៃ​ទី​៥-៦ ខែ​សីហានេះ។ តាមគម្រោង អូលីវ៉ា និងកូនសិស្សជាង២០រូប នឹងធ្វើដំណើរមកកម្ពុជាវិញនៅថ្ងៃទី៧ ខែសីហា បន្ទាប់ពីដើរបង្ហាញម៉ូដចប់សព្វគ្រប់៕

អត្ថបទ៖ រ៉ាត់ ចាន់ធីតា រូបភាព៖ ឃាង ទូច