នេះជាដំណឹងល្អមួយសម្រាប់ កុមារ កម្ពុជា ចាប់អាយុ ៧ ឆ្នាំដល់ ១៥ ឆ្នាំ អាចដាក់ពាក្យចូលរួមប្រលងចម្រៀង កុមារក្លាហាន របស់ Global House Cambodia ចាប់ពីថ្ងៃទី ០៣ ខែ មិថុនា នេះតទៅរហូតដល់ថ្ងៃទី ២០ ខែ មិថុនា ដោយលក្ខខណ្ឌងាយៗ ថែមទាំងទទួលបានប្រាក់រង្វាន់ជាច្រើន ។  កាលពីថ្ងៃទី ០៣ និងថ្ងៃទី ០៤ ខែ មិថុនា កន្លងមកនេះ Global House Cambodia បានចែកខិតប័ណ្ណអំពីការចុះឈ្មោះប្រលងចម្រៀង « កុមារក្លាហាន »  នៅសួនសត្វ Safari  និង សួនទឹក Garden City Water Park ដោយមានកុមារជាច្រើនចាប់អារម្មណ៍ និងចូលរួមដាក់ពាក្យប្រលងកម្មវិធីចម្រៀងនេះ ។

Global House Cambodia រៀបចំកម្មវិធីប្រលងចម្រៀង កុមារក្លាហាន នេះឡើង គឺដើម្បីស្វែងរកកុមារដែលមានទេពកោលស្យ ខាងចម្រៀង និងអាចបញ្ចេញសមត្ថភាពរបស់ពួកគេនៅលើឆាក ។ សម្រាប់លក្ខខណ្ឌចូលរួមប្រលងគឺងាយៗ ថែមទាំងទទួលបានប្រាក់រង្វាន់សរុប 3400 000 រៀល ។  លោក សួន ឧត្តម ផ្នែកបញ្ជាទិញនៅក្រុមហ៊ុន  Global House Cambodia បានឱ្យដឹងថា កម្មវិធីប្រលងចម្រៀង កុមារក្លាហាន ទើបតែរៀបចំឡើងនៅក្នុងប្រទេស កម្ពុជា ជាលើកដំបូងប៉ុណ្ណោះ លោកសង្ឃឹមថា នឹងមាន កុមារ កម្ពុជា ជាច្រើនចូលរួមប្រលងក្នុងកម្មវិធីនេះ ។ 

សម្រាប់ទម្រង់ពាក្យសុំចូលរួមក្នុងកម្មវិធីប្រឡងចម្រៀង Singing Contest ឬ កុមារក្លាហាន គឺប្អូនៗអាចដាក់ពាក្យចាប់ពីថ្ងៃទី ០៣ ខែ មិនថុនា រហូតដល់ថ្ងៃទី 20 ខែមិថុនា ហើយកុមារដែលមានអាយុ ៧ ឆ្នាំ រហូតដល់ ១៥ ឆ្នាំ អាចដាក់ពាក្យចូលរួមប្រលងបានទាំងអស់ ដោយមិនកំណត់ភេទ និងទីលំនៅ អ្នកចូលរួមប្រកួតមិនត្រូវបានជាប់កិច្ចសន្យាកុងត្រាជាមួយផលិតកម្មណាមួយឡើយ ។ 

សម្រាប់ វគ្គ Online Audition គឺប្អូនៗគ្រាន់តែផ្ញើវីដេអូឃ្លីបនៃការច្រៀងផ្ទាល់ ដោយមានឬគ្មាន តន្ត្រីប្រកប ត្រៀមខ្លួនដើម្បីណែនាំខ្លួនអ្នកក្នុងឃ្លីបវីដេអូ ដែលបានធ្វើ មិនត្រូវប្រើកម្មវិធីណាមួយដើម្បីរៀបចំ សំលេងនោះទេ។ ចំណែករបៀបផ្ញើ លោកអ្នកគ្រាន់តែផ្ញើ VDO តាម Telegram ដែលមានលេខទូរស័ព្ទ 096 94 60 956  រួចភ្ជាប់មក ជាមួយឈោ្មះ លេខទូរស័ព្ទ និងអាយុរបស់បេក្ខជនជាការស្រេច។ វីដេអូ ប្រកួតមិនត្រូវលើសពី 5 នាទី ។  បេក្ខជនម្នាក់អាចផ្ញើវីដេអូបានត្រឹមតែ 1 ឃ្លីបតែប៉ុណ្ណោះ ។ ប្រសិនបើចង់ជ្រាបច្បាស់ជាងនេះ កុំភ្លេចចូលរួមទាំងអស់គ្នា ។ 

លោក សួន ឧត្តម បានបន្ថែមទៀតថា លោកជំរុញនិងលើកទឹកចិត្តឱ្យប្អូនៗកុមារទាំងអស់ដែលមានសមត្ថភាព មកដាក់ពាក្យប្រលងទាំងអស់គ្នា ។ គួរបញ្ជាក់ផងដែរថា សម្រាប់ប្រាក់រង្វាន់សរុបនៅក្នុងកម្មវិធីប្រលង « កុមារក្លាហាន » គឺសរុបទាំងអស់ 3400 000 រៀល ហើយប្រាក់រង្វាន់ជ័យលោភីលេខ ១ គឺទទួលបានទឹកប្រាក់ 1 000 000 រៀល ចំណែកជ័យលោភីលេខ ២ បានប្រាក់រង្វាន់ 8 00 000 រៀល និងលេខ ៣ បានប្រាក់រង្វាន់ 600 000 រៀល រួមជាមួយនិងប្រាក់រង្វាន់កិត្តិយសជាច្រើនផ្សេងទៀត ៕  
 

អត្ថបទ ៖ ម៉ា រីសា រូបភាព ៖ ហ៊ុន សុជាតា