លោក Donald Trump អតីតប្រធានាធិបតីអាមេរិក ត្រូវបានចោទប្រកាន់ទោសដោយគណៈវិនិច្ឆ័យប្រចាំសង្កាត់Manhattan ទីក្រុងNew York នៃសហរដ្ឋអាមេរិក បន្ទាប់ពីមានការស៊ើបអង្កេតទៅលើករណីសូកលុយបំបិទមាត់ទៅឱ្យតារាភាពយន្តអាសអាភាសStormy Daniels។

ករណីចោទប្រកាន់ទោសនេះបានធ្វើឱ្យលោកDonald Trump ក្លាយជាអតីតប្រធានាធិបតីអាមេរិកទី១ ដែលត្រូវចោទក្នុងបទល្មើសព្រហ្មទណ្ឌ។ រឿងរ៉ាវនេះកើតឡើងស្ថិតនៅក្នុងអំឡុងពេលដែលលោក Trump បន្តព្យាយាមឈរឈ្មោះបោះឆ្នោតប្រធានាធិបតីអាមេរិកអាណត្តិថ្មី។

លោក Trump  បានលើកឡើងនៅក្នុងសេចក្តីថ្លែងការណ៍ថា «លោកពិតជាមិនបានដឹងអ្វីទាំងអស់»។

«នេះជាបទចោទប្រកាន់លក្ខណៈនយោបាយ និងការជ្រៀតជ្រែកការបោះឆ្នោតស្ថិតនៅក្នុងកម្រិតខ្ពស់បំផុតនៃប្រវត្តិសាស្ត្រអាមេរិក» ។នេះជាការលើកឡើងរបស់លោកTrump នៅក្នុងសេចក្តីថ្លែងការណ៍ប៉ុន្តែលោកមិនបានផ្តល់ភស្តុតាងអ្វីនោះទេ។

ភ្លាមៗលោកTrump  អំពាវនាវទៅកាន់ក្រុមអ្នកគាំទ្រឱ្យផ្តល់ថវិកាសម្រាប់កិច្ចការពារផ្នែកច្បាប់។ លោកក៏ទទួលបានថវិកាច្រើនជាង២លានដុល្លារអាមេរិក។ យោងតាមការប្រកាសពីក្រុមយុទ្ធនាការរៃអង្គាសថវិកា។

សេចក្តីលំអិតនៃទោសដែលត្រូវចោទប្រកាន់ នៅមិនទាន់បានដឹងនៅឡើយទេ។ ទោសចោទប្រកាន់ទំនងជានឹងត្រូវបើកបង្ហាញឱ្យដឹងដោយតុលាការ នៅប៉ុន្មានថ្ងៃខាងមុខនេះ។

អតីតប្រធានាធិបតីអាមេរិក លោក Donald Trump ទំនងនឹងត្រូវបង្ហាញវត្តមាននៅតុលាការនៅថ្ងៃអង្គារសប្តាហ៍ក្រោយ។

ប្រែសម្រួល៖ណាវ័ន្ត