លោក Ferdinand Marcos Jr  ប្រធានាធិបតីហ្វីលីពីននៅថ្ងៃពុធ(៥តុលា) បានលើកឡើងថា ប្រទេសហ្វីលីពីន ប្រហែលត្រូវការងាកទៅរកប្រទេសរុស្ស៊ី ដើម្បី បំពេញតម្រូវការថាមពលប្រេងដែលប្រទេសរបស់ខ្លួនត្រូវការជាចាំបាច់។

ការលើកឡើងរបស់លោកMarcos ធ្វើឡើងនៅចំពេលតម្លៃថាមពលសាកល កើនឡើងដោយសារសម្ពាធពី បណ្តាប្រទេសលោកខាងលិចទៅលើប្រទេស រុស្ស៊ីក្រោយរុស្ស៊ីលើកទ័ពចូលឈ្លានពានប្រទេសអ៊ុយក្រែន។

ថ្លែងទៅកាន់ក្រុមអ្នកសារព័ត៌មាន លោក Marcos ដែលជាប្រធានាធិបតីហ្វីលីពីន និងជារដ្ឋមន្ត្រីក្រសួងកសិកម្មផង បានលើកឡើងថា​ ប្រទេសហ្វីលីពីន ប្រហែលត្រូវការកិច្ចព្រមព្រៀងជាមួយប្រទេសរុស្ស៊ី សម្រាប់ការផ្គត់ផ្គង់ជីកសិកម្ម។

លោក Marcos លើកឡើងយ៉ាងដូច្នេះ «យើង ត្រូវមានការយល់ឃើញតុល្យភាពពីព្រោះការពិតនៃបញ្ហា យើងប្រហែលត្រូវការរុស្ស៊ីទៅលើផ្នែកថាមពលប្រេង និងជីកសិកម្ម»។

លោក Ferdinand Marcos Jr  ប្រធានាធិបតីហ្វីលីពីន ក៏បានលើកឡើងផងដែលថា លោកចង់ឱ្យប្រទេសហ្វីលីពីនដើរតួនាទីសំខាន់ក្នុងការ ជម្រុញឱ្យមាន សន្តិភាពក្នុងតំបន់ ចំពេលមានបញ្ហាបង្កឡើងពីប្រទេសកូរ៉េខាងជើង និងភាពតានតឹងរវាងប្រទេសចិន និងកោះតៃវ៉ាន់។

ប្រែសម្រួល៖ណាវ័ន្ត