ថ្ងៃសុក្រ ទី២៦ ខែមេសា ឆ្នាំ២០២៤
ថ្ងៃសុក្រ ទី២៦ ខែមេសា ឆ្នាំ២០២៤
នាយករដ្ឋមន្ត្រីថៃ លោកប្រាយុទ្ធចាន់អូចា ថ្លែងថារដ្ឋាភិបាលរបស់លោកពិតជាយកចិត្តទុកដាក់ខ្ពស់ចំពោះសុខទុក្ខរបស់ជនភៀសខ្លួនដែលរត់គេចចេញពីអំពើហិង្សានៅប្រទេសភូមា ហើយឆ្លងចូលទៅក្នុងទឹកដីថៃ។ លោកថាប្រទេសថៃបានជួយពួកគេច្រើនណាស់នៅក្នុងរឿងនេះ។ លោកថ្លែងបែបនេះបន្ទាប់ពីបានបិទបញ្ចប់កិច្ចប្រជុំគណៈរដ្ឋមន្ត្រី។
លោកប្រាយុទ្ធចាន់អូចាថ្លែងថាមិនមានហេតុផលណាមួយដែលយើងមិនយកចិត្តទុកដាក់ចំពោះបញ្ហានេះទេ នៅពេលដែលគេនិយាយទៅដល់បញ្ហាពាក់ព័ន្ធនឹងមនុស្សធម៌ ពីព្រោះនេះជារឿងពាក់ព័ន្ធនឹងអាយុជីវិតរបស់មនុស្ស។
រដ្ឋាភិបាលថៃ តាមប្រសាន៍របស់លោកប្រាយុទ្ធចាន់អូចា បានស្នើសុំបង្កើតគោលការណ៍ណែនាំមួយ ដើម្បីដោះស្រាយវិបត្តិនៅប្រទេសភូមាតាមរយៈយន្តការក្រសួងការបរទេសផង និងយន្តការសមាគមអាស៊ានផង។ គេរំពឹងថានឹងមានកិច្ចប្រជុំបន្ទាន់មួយនៅក្នុងពេលឆាប់ៗនេះ។ លោកប្រាយុទ្ធថ្លែងបន្តទៀតថាយើងត្រូវតែដោះស្រាយបញ្ហាទាំងអស់ជាប្រព័ន្ធ។
លោកថាជនភៀសខ្លួនភូមាមួយចំនួនដែលត្រូវរបួសដោយសារការប្រយុទ្ធគ្នារវាងក្រុមប្រដាប់អាវុធនៅក្នុងប្រទេសភូមា ត្រូវបានគេដឹកជញ្ជូនចូលទឹកដីថៃដើម្បីទទួលការព្យាបាលពីគ្រូពេទ្យ។ នាយកដ្ឋានអន្តោប្រវេសន៍ថៃអះអាងថាចំនួនជនភៀសខ្លួនដែលរត់ទៅ ជ្រកកោននៅខេត្តមេហុងសឺនមានចំនួន២ពាន់នាក់។
ចំណែកនាយកដ្ឋានពាណិជ្ជកម្មឆ្លងដែនបង្ហាញថាថៃបានបើកច្រកព្រំដែនឡើងវិញនៅត្រង់ចំណុចគោលដៅមួយចំនួន ដើម្បីជួយសម្រួលដល់ការហូរចូលនៃជនភៀសខ្លួន។ អាជ្ញាធរថៃបានសម្រេចចិត្តបើកប៉ុស្តិ៍ឆែកឆេរនៅច្រកព្រំដែនជាប់នឹងតំបន់បានមេហុង នៃខេត្តត្រាត និងច្រកសំខាន់ៗមួយចំនួនទៀត៕
ប្រែសម្រួល៖អនសំអាង
