ថ្ងៃច័ន្ទ ទី២៩ ខែមេសា ឆ្នាំ២០២៤
ថ្ងៃច័ន្ទ ទី២៩ ខែមេសា ឆ្នាំ២០២៤
ជារឿងដ៏ក្ដៅគគុកមួយទៀតហើយក្នុងសង្គមសិល្បៈកម្ពុជា ដោយតារាសម្ដែងជួរមុខ អ្នកនាង ស្វែង សុជាតា ថ្មីៗនេះបានចេញមុខព្រលះចំៗទៅផលិតកម្មមួយឲ្យចូលខ្លួនមកដោះស្រាយរឿងមើលងាយពេលវេលារបស់ខ្លួន។
មិនមែនជារឿងថ្មីដែលកើតមានក្នុងសង្គមសិល្បៈនោះទេ ដែលតារាសម្តែងកើតមានបញ្ហាទំនាស់ជាមួយខាងផលិតកម្ម ដោយសារបញ្ហារឿងលុយកាក់ ឬការមិនគោរពពេលវេលានៃការថត ដែលពេលខ្លះកើតឡើងពីភាគីខាងតួ ខ្លះទៀតកើតឡើងដោយសារខាងផលិតកម្ម។
តួយ៉ាង ថ្មីៗនេះរឿងរ៉ាវដដែរនេះបានកំពុងកើតឡើងច្រំដែលចំពោះសង្គមសិល្បៈម្តងទៀតហើយ ដោយថ្មីៗនេះ គេទើបឃើញតារាសម្តែងជួរមុខល្បីល្បាញក្នុងរឿងហូលីវូដជាច្រើន អ្នកនាង ស្វែង សុជាតា បង្ហោះសារជាសាធារណៈមួយលើបណ្តាញសង្គម ប្រកាសយ៉ាងក្តែងៗ ហៅឲ្យផលិតកម្មមួយចូលខ្លួនដោះស្រាយរឿងមើលងាយពេលវេលារបស់ខ្លួន។
ស្វែង សុជាតា សរសេររៀបរាប់ថា៖ «ថ្ងៃនេះអត់ទាន់និយាយទេ ផលិតកម្មមួយដែលខ្វះភាពទទួលខុសត្រូវខ្ញុំទុកពេលអោយ៤៨ម៉ោងដោះស្រាយជាមួយខ្ញុំហើយត្រូវលើកទូរសព្ទ័ខ្ញុំ ចចារជាមួយខ្ញុំក្នុងករណីដែលអ្នកធ្វើការ ខ្ជីខ្ជា យកពេលវេលារបស់ខ្ញុំមកលេងសើច អ្នកបំផ្លាញលុយរបស់ខ្ញុំដែលអ្នកធ្វើការអត់ច្បាស់លាស់ ។»
តារាជំនាញសម្ដែងតួឆ្នាស់ឆ្នើមរូបនេះបន្តថា «បើមិនលើកអ្នកស្រីនឹងត្រូវខ្ញុំសូមបញ្ចេញឈ្មោះហើយ អោយបងប្រុសអ្នកហៅតួនោះលើកទូរសព្ទ័ខ្ញុំរឺតេមកខ្ញុំជាកំហិត ព្រោះជាកំហុសរបស់ផលិតកម្មទាំងស្រុង។
បើពុំនោះទេខ្ញុំមិនសសេរទៀតទេ គឺនិយាយដោយមាត់តែម្តង សូមជំរាបកុំមើលងាយពេលវេលារបស់ខ្ញុំអោយសោះ ព្រោះ៣ថ្ងៃអ្នកប្លុកខ្ញុំ ក៏ផលិតកម្មគេផ្សេងហៅដែរ ចឹងមាននយ័អ្នកត្រូវសងលុយខ្ញុំ អោយគ្រប់ចំនួន ដែលអ្នកប្លុកខ្ញុំ។»
បន្ថែមពីការរៀបរាប់ខាងលើ ស្វែង សុជាតា ក៏បានរៀបរាប់ឲ្យដឹងពីទម្លាប់ការងាររបស់នាងនាពេលកន្លងទៅឲ្យដឹងផងដែរ។ យ៉ាងណាមិញ បន្ទាប់ពីបញ្ចេញសារយ៉ាងក្ដៅគគុកនេះហើយ គេនៅមិនទាន់ឃើញភាគីខាងម្ចាស់ផលិតកម្មចេញមុខមកតតាំងនៅឡើយទេ។
សូមជម្រាបថា ស្វែង សុជាតា ជាតារាសម្តែងដ៏ល្បីល្បាញ និងមានប្រជាប្រិយភាពម្នាក់ក្នុងចំណោមតារាសម្តែងរួមជំនាន់។ ត្បិតធ្លាប់មានបញ្ហា និងរឿងរ៉ាវជីវិតឯកជនបាក់បែកប្រះឆា ប៉ះទង្គិចដល់ការងារសិល្បៈកាលពេលកន្លងទៅក៏ពិតមែន តែតារាសម្តែងរូបនេះនៅតែអាចងើបឈរលើវិថីសិល្បៈវិញបាន។
ប្រឡូកសិល្បៈអស់រយៈពេលជាច្រើនឆ្នាំ អ្នកនាង ស្វែង សុជាតា ល្បីល្បាញខ្លាំងទាំងរឿងដុំ និងរឿងភាគទូរទស្សន៍ មិនតែប៉ុណ្ណោះ តារាសម្តែងរូបនេះថែមទាំងល្បីល្បាញក្នុងរឿងហូលីវូដច្រើនរឿងទៀតផង។
អត្ថបទ៖ រ៉ាត់ ចាន់ធីតា រូបភាព៖ ភីអិនអិន