ប្រជាពលរដ្ឋនៅទីក្រុង Hiroshima (ហ៊ីរ៉ូស៊ីម៉ា) បានបង្ហាញអារម្មណ៍ផ្សេងៗគ្នាខណៈភាពយន្តនិយាយពីការផលិតគ្រាប់បែកបរមាណូ “Oppenheimer” ចាក់បញ្ចាំងនៅជប៉ុន។

ខ្សែភាពយន្ត "Openheimer" (អូផេនហាយមើ) ដែលទើបទទួលបានពានរង្វាន់អូស្ការ បានបង្ហាញខ្លួនជាលើកដំបូងនៅក្នុងប្រទេសជប៉ុនកាលពីថ្ងៃទី២៩ ខែមីនា។ ភាពយន្តប្រវត្តិសាស្ត្រមានរយៈពេល ៣ ម៉ោងដែលនិយាយអំពីការកសាងគ្រាប់បែកបរមាណូដំបូងបង្អស់របស់ពិភពលោកមួយនេះ បានឈ្នះពានរង្វាន់អូស្ការចំនួន ៧ រួមទាំងពានរង្វាន់ធំ “ភាពយន្តល្អបំផុត”។

គ្រាន់តែឮថារឿងនេះចាប់ផ្ដើមចាក់បញ្ចាំង ពលរដ្ឋនៅទីក្រុងហ៊ីរ៉ូស៊ីម៉ា អ្នកស្រី Kanagae (កាណាកេ) ដែលមានវ័យ ៦៥ ឆ្នាំបានប្រញាប់ទៅទស្សនាភ្លាមៗ និងបានបញ្ចេញចំណាប់អារម្មណ៍ថា ភាពយន្តនេះគឺមានតម្លៃគ្រប់គ្រាន់ក្នុងការទស្សនា ប៉ុន្តែអ្នកស្រីមានអារម្មណ៍ខកចិត្តចំពោះសាច់រឿងនៅចុងបញ្ចប់ និងការដែលពួកគេមិនបាននិយាយពីជនរងគ្រោះដោយសារការទម្លាក់គ្រាប់បែកនៅហ៊ីរ៉ូស៊ីម៉ា។

យុវជនដែលជាអ្នករស់នៅទីក្រុងហ៊ីរ៉ូស៊ីម៉ាម្នាក់ទៀតបាននិយាយថា លោកគឺជាអ្នកគាំទ្ររបស់អ្នកដឹកនាំរឿង Christopher Nolan (គ្រីស្តូហ្វើ ណូឡាន) ប៉ុន្តែលោកមិនគិតថាភាពយន្តនេះនឹងទទួលបានការគាំទ្រនៅក្នុងប្រទេសជប៉ុននោះទេ។

លោកថា ខណៈភាពយន្តហាក់បង្ហាញពីសមត្ថភាពអស្ចារ្យរបស់គ្រាប់បែកបរមាណូ ប៉ុន្តែសម្រាប់អ្នកហ៊ីរ៉ូស៊ីម៉ា វាពិតជាពិបាកទស្សនា។គួរបញ្ជាក់ថា ជប៉ុនគឺជាប្រទេសតែមួយគត់ដែលបានទទួលរងការទម្លាក់គ្រាប់បែកបរមាណូ ដែលបានឆក់យកជីវិតមនុស្សជាង ២ សែននាក់ក្នុងឆ្នាំ ១៩៤៥ ក្នុងអំឡុងសង្គ្រាមលោកលើកទីពីរ ៕
 

ប្រែសម្រួល៖ វ៉ាន់ថន