លោក Anutin Charnvirakul នាយករដ្ឋមន្ត្រីថៃ បាននិយាយនៅថ្ងៃពុធ(២៤កញ្ញា) លោក គ្រោងនឹងរំលាយសភានៅត្រឹមចុងខែមករា ហើយការបោះឆ្នោតសាកលនឹងធ្វើឡើងនៅខែមីនា ឬដើមខែមេសា។

លោកAnutin  បានឈ្នះការបោះឆ្នោនៅសភាកាលពីដើមខែកញ្ញាក្លាយជានាយករដ្ឋមន្ត្រីទី៣របស់ប្រទេសថៃ គិតត្រឹមពេលវេលាពីខែសីហាឆ្នាំ២០២៣ ក្រោយលោកបានដកគណបក្សBhumjaithai របស់លោកចេញពីរដ្ឋាភិបាលគណបក្សចំរុះដឹកនាំដោយគណបក្សPheu Thai។ 

ក្នុងការឡើងកាន់អំណាចនេះ លោកAnutin  ទទួលបានការគាំទ្រពីគណបក្សប្រជាជនដែលជាគណបក្សធំនៅក្នុងសភារបស់ប្រទេសថៃ ជាមួយនិងលក្ខខណ្ឌមួយចំនួនដើម្បីគាំទ្រមេដឹកនាំគណបក្សBhumjaithaiឡើងកាន់តំណែងនាយករដ្ឋមន្ត្រីមួយនេះ។ ការទាមទារទាំងអស់នោះ រួមមានការបោះឆ្នោតសាកលក្នុងពេល៤ខែនៃការកាន់អំណាច។ 

ក្នុងសន្និសីទសារព័ត៌មាននៅថ្ងៃពុធ លោក Anutin Charnvirakul នាយករដ្ឋមន្ត្រីថៃ បានលើកឡើងថា រដ្ឋាភិបាលត្រៀមវិធានការជាច្រើនក្នុងការដោះស្រាយវិបត្តិសេដ្ឋកិច្ច រួមមាន សម្រាលថ្លៃចំណាយលើជីវភាពរស់នៅប្រចាំថ្ងៃរបស់ប្រជាជន និងដោះស្រាយការធ្លាក់ចុះតម្លៃផលិតផលកសិកម្ម។

ប្រែសម្រួល៖ណាវ័ន្ត