ថ្ងៃ១១កញ្ញាឆ្នាំ២០២៥នេះ ជាថ្ងៃគម្រប់ខួប២៤ឆ្នាំ ចាប់តាំងពីកើតមានការវាយប្រហារភេរវកម្ម ទៅលើសហរដ្ឋអាមេរិក នៅថ្ងៃ១១កញ្ញាកាលពីឆ្នាំ២០០១។ 

នៅថ្ងៃនោះ មនុស្សជិត៣០០០នាក់ត្រូវបានសម្លាប់ នៅពេលយន្តហោះជាច្រើនគ្រឿងដែលគេចាប់ជម្រិតនោះ បានហោះបុកចូលទីតាំង៣ខុសៗគ្នា មាន អាគារមជ្ឈមណ្ឌលពាណិជ្ជកម្មពិភពលោក នៅទីក្រុងញូវយ៉ក, យន្តហោះបុកចូលមន្ទីបញ្ចកោណនៅទីក្រុងវ៉ាស៊ីនតោនឌីស៊ី និងយន្តហោះធ្លាក់នៅទីវាលនៅរដ្ឋផេនស៊ីវីនៀ។  

ពិធីដ៏ឧឡារិកមួយ នឹងប្រារព្ធធ្វើឡើងនៅថ្ងៃព្រហស្បតិ៍នៅ ​Memorial & Museum ១១កញ្ញា នៅសង្កាត់Lower Manhattan ដែលជាទីតាំងអាគារភ្លោះមជ្ឈមណ្ឌលពាណិជ្ជកម្មពិភពលោក។ 

សម្លេងជួង Bell of Hope នឹងបន្លឺឡើងនៅអាគារព្រះវិហារសាសនាគ្រឹស្ត St. Paul’s Chapel នៅវេលាម៉ោង៨និង៤៦នាទីព្រឹក(ជាពេលដែលយន្តហោះទី១បុកអាគារភ្លោះមជ្ឈមណ្ឌលពាណិជ្ជកម្មពិភពលោកឆ្នាំ២០០១)។ 

បុគ្គលិកមន្ទីរបញ្ចកោណនៅទីក្រុងវ៉ាស៊ីនតោនឌីស៊ី នឹងចូលរួមពិធីរំលឹកខួបនេះ ១ថ្ងៃមុន ថ្ងៃ១១កញ្ញា គឺនៅថ្ងៃពុធ(១០កញ្ញា)។

លោក Osama bin Laden និងក្រុមអាល់កៃដា បានអះអាងទទួលខុសត្រូវចំពោះការវាយប្រហារអត្តឃាតនេះកាលពី២៤ឆ្នាំមុន ជាហេតុការណ៍ដែលនាំឱ្យកើតមានសង្គ្រាមដឹកនាំដោយសហរដ្ឋអាមេរិកនៅប្រទេសអាហ្គានីស្ថាន។ 

ប្រែសម្រួល៖ណាវ័ន្ត