ក្នុងឆមាសទី ១ ឆ្នាំ ២០២៥នេះ វិស័យអាកាសចរណ៍ស៊ីវិលរបស់ប្រទេសចិន សម្រេចបាននូវ ជើងហោះហើរ ៣៧០លានជើង កើនឡើងប្រមាណ ១១% ធៀបនឹងពេលដូចគ្នា កាលពីឆ្នាំមុន។ នេះបើយោងតាមការចេញផ្សាយដោយ សារព័ត៌មាន CCTV នៅថ្ងៃនេះ។

រដ្ឋបាលអាកាសចរណ៍ស៊ីវិលចិន បានបង្កើតកំណត់ត្រាចរាចរណ៍ថ្មី នៅក្នុងឆមាសទី ១ ឆ្នាំ ២០២៥នេះ ដោយគ្រប់គ្រងការធ្វើដំណើររបស់អ្នកដំណើរចំនួន ៣៧០លាននាក់ និងដឹកជញ្ជូនទំនិញ ជាង ៤ពាន់លានតោន។

ក្នុងអំឡុងពេលខែមករាដល់ខែមិថុនានេះ ប្រទេសចិន បានបន្ថែមផ្លូវហោះហើរចំនួន ១២៣ សម្រាប់ យន្តហោះដឹកអ្នកដំណើរអន្តរជាតិ ដែលជំរុញឱ្យចរាចរណ៍ទៅក្រៅប្រទេស កើនឡើង ២៨% ធៀបនឹងពេលដូចគ្នា កាលពីឆ្នាំមុន។

រដ្ឋបាលអាកាសចរណ៍ស៊ីវិលចិន បានលើកឡើងថា បរិមាណទំនិញដឹកជញ្ជូនក្នុងស្រុក និងអន្តរជាតិ បានកើនឡើងខ្ពស់ដូចគ្នា និងបានបន្ថែមគោលដៅដឹកទំនិញអន្តរជាតិថ្មីចំនួន ១៦បន្ថែម។

បណ្តាញផ្លូវអាកាសរបស់ប្រទេសចិន ត្រូវបានធ្វើឱ្យប្រសើរឡើងជាបន្តបន្ទាប់ ដែលឥឡូវនេះបានភ្ជាប់ទីក្រុងចំនួន ១០៦ នៅទូទាំង ៥០ប្រទេស ដែលផ្តល់នូវការចូលទៅកាន់ទីផ្សារស្នូលរបស់ពិភពលោក ដោយរលូន។

សូមជម្រាបថា គិតត្រឹមចុងឆ្នាំ ២០២៤ ប្រទេសចិន មានក្រុមហ៊ុនអាកាសចរណ៍ដឹកទំនិញចំនួន ១៣ ដែលកំពុងប្រតិបត្តិការយន្តហោះដឹកទំនិញចំនួន ២៦៨គ្រឿង ការកើនឡើងនៃក្រុមហ៊ុនអាកាសចរណ៍ចំនួន ២ និងយន្តហោះចំនួន ៨២ ធៀបនឹង ៤ឆ្នាំមុន៕

អត្ថបទ៖ ងួន សុភ័ត្រ្តា រូបភាព៖ ឯកសារ