ក្រុមហ៊ុនស្រាវជ្រាវទីផ្សារ Rho Motion បានគូសបញ្ជាក់ថា ការលក់ជាសាកលនៃ រថយន្តអគ្គិសនី និងប្រភេទហាយប្រ៊ីដ បានកើនឡើង ២៤% នៅក្នុងខែមិថុនា ធៀបនឹងខែដូចគ្នា កាលពីឆ្នាំមុន ដែលនាំមុខដោយការកើនឡើងនៃ ការលក់នៅក្នុងប្រទេសចិន និងអឺរ៉ុប។អ្នកគ្រប់គ្រងទិន្នន័យ Charles Lester បានប្រាប់បញ្ជាក់ថា ការលក់រថយន្តអគ្គិសនី នៅសហរដ្ឋអាមេរិកបានធ្លាក់ចុះ ១% ក្នុងខែមិថុនា ខណៈការលក់ ពិបាកនឹងកើនឡើងមកវិញក្នុងឆមាសទី ២។

លើសពីនេះ ក្រុមហ៊ុនផលិតរថយន្តទូទាំងសកលលោក ប្រឈមនឹងពន្ធនាំចូល ២៥% របស់សហរដ្ឋអាមេរិក ដែលជាទីផ្សាររថយន្តធំទី ២ របស់ពិភពលោក ដែលបណ្តាលឱ្យពួកគេជាច្រើន ទម្លាក់ទស្សនវិស័យសម្រាប់ឆ្នាំ ២០២៥។នៅអឺរ៉ុប ការលើកទឹកចិត្ត បើកផ្ទាំងថ្មីសម្រាប់អ្នកទិញរាយ និងកងនាវានៅក្នុងទីផ្សារសំខាន់ៗដូចជាប្រទេសអាល្លឺម៉ង់ និងអេស្ប៉ាញ រួមជាមួយនឹងការកើនឡើងនៃរថយន្ត EV ថោក ត្រូវបានគេរំពឹងថានឹងគាំទ្រដល់ការលក់រថយន្តអគ្គិសនីរហូតដល់ពាក់កណ្តាលទីពីរនៃឆ្នាំនេះ។

ទិន្នន័យរបស់ Rho Motion បានបង្ហាញថា ការលក់រថយន្តអគ្គិសនីសុទ្ធ និងរថយន្ត Plug-in Hybrid ទូទាំងពិភពលោក បានកើនឡើងដល់ ១លាន ៨សែនគ្រឿង ក្នុងខែមិថុនា។ការលក់នៅក្នុងប្រទេសចិន បានកើនឡើង ២៨% ធៀបនឹងខែដូចគ្នានៃឆ្នាំ ២០២៤ ដល់ ១លាន ១សែនគ្រឿង។

នៅអឺរ៉ុប ការលក់រថយន្តអគ្គិសនី មានការកើនឡើង ២៣% ដល់ ៤សែនគ្រឿង ខណៈនៅអាមេរិកខាងជើង ការលក់បានធ្លាក់ចុះ ៩% មកត្រឹម ១សែនគ្រឿង។ជាចុងក្រោយ ស្ថាប័នស្រាវជ្រាវខាងលើ បានបញ្ជាក់ថា រដ្ឋាភិបាលជុំវិញពិភពលោក កំពុងអនុវត្តគោលនយោបាយដើម្បីលើកទឹកចិត្តដល់ ការប្រើប្រាស់រថយន្តអគ្គិសនី ខណៈដែលភាពតានតឹងពាណិជ្ជកម្ម និងការធ្លាក់ចុះនៃទីផ្សាររថយន្ត អាចបណ្តាលឱ្យមាន ការបិទរោងចក្រ និងការបាត់បង់ការងារជាដើម៕

អត្ថបទ៖ ងួន សុភ័ត្រ្តា រូបភាព៖ ឯកសារ