ប្រទេសចិននៅថ្ងៃព្រហស្បតិ៍នេះបានជំរុញឱ្យសហរដ្ឋអាមេរិកលើកពន្ធភ្លាមៗជាពន្ធដែលសហរដ្ឋអាមេរិកទើបបានប្រកាសថ្មីចុងក្រោយបំផុតនេះ ហើយបានសច្ចានឹងចាត់វិធានការតបតដើម្បីការពារផលប្រយោជន៍របស់ប្រទេសចិន។ 

លោកប្រធានាធិបតីអាមេរិក Donald Trump  បានប្រកាសតំឡើងពន្ធលើដៃគូពាណិជ្ជកម្មអាមេរិកទាំងអស់នៅជុំវិញពិភពលោកនៅថ្ងៃពុធ(២មេសា)។ 

ចំណាត់ការរបស់អាមេរិក ច្រានចោលតុល្យភាពផលប្រយោជន៍ដែលបានឯកភាពគ្នានៅក្នុងកិច្ចចរចារពាណិជ្ជកម្មពហុភាគីក្នុងរយៈកាលច្រើនឆ្នាំមក ហើយការពិតនោះ គឺសហរដ្ឋអាមេរិកទទួលបានប្រយោជន៍យ៉ាងច្រើនសម្បើមពីពាណិជ្ជកម្មអន្តរជាតិ។ ក្រសួងពាណិជ្ជកម្មចិនលើកឡើងក្នុងសេចក្តីថ្លែងការណ៍។ 

នៅក្នុងសេចក្តីថ្លែងការណ៍ក្រសួងពាណិជ្ជកម្មចិន បានលើកឡើងថា  ប្រទេសចិនប្រឆាំងពេញទំហឹងនឹងការតំឡើងពន្ធរបស់អាមេរិក ហើយនឹងចាត់វិធានការតបតដើម្បីការពារសិទ្ធនិងផលប្រយោជន៍របស់ប្រទេសចិន។ 

លោកប្រធានាធិបតី Trump នៅថ្ងៃពុធ បានប្រកាសដាក់ពន្ធលើប្រទេសចិន៣៤ភាគរយ បន្ថែមពីលើ២០ភាគរយដែលបានប្រកាសដាក់ពន្ធលើប្រទេសចិនកាលពីដើមឆ្នាំ ដែលធ្វើឱ្យចំនួនពន្ធសរុបថ្មីដែលសហរដ្ឋអាមេរិកបានដាក់លើប្រទេសចិនមានដល់ទៅ៥៤ភាគរយ។ ចំនួននេះជិតស្មើទៅនឹងតួលេខពន្ធ៦០ភាគរយដែលលោកបានគំរាមកំហែងនៅអំឡុងពេលយុទ្ធនាការបោះឆ្នោតប្រធានាធិបតីអាមេរិក។​

ប្រែសម្រួល៖ណាវ័ន្ត