ប្រទេសចិនបានបន្តធ្វើលំហាត់យោធានៅជុំវិញកោះតៃវ៉ាន់សម្រាប់ថ្ងៃទីពីរនៅថ្ងៃពុធនេះក្រោយពីដំណើរទស្សនកិច្ចរដ្ឋមន្ត្រីការពារជាតិអាម៉េរិកមកកាន់តំបន់អាស៊ីកាលពីពេលថ្មីៗនេះ។

ប្រទេសចិនបានចាប់ផ្តើមសមយុទ្ធយោធា កងទ័ពជើងទឹក និងកងកម្លាំងគ្រាប់រ៉ុក្កែតសម្រាប់ថ្ងៃទីពីរនៅជុំវិញកោះតៃវ៉ាន់នៅថ្ងៃពុធនេះដោយផ្តោតលើការពង្រឹងសមត្ថភាពក្នុងការហ៊ុំព័ទ្ធកោះនេះ និងធ្វើការវាយប្រហារឱ្យកាន់តែចំគោលដៅជាក់ច្បាស់។

ទូរទស្សន៍រដ្ឋចិន CCTV បាននិយាយថា សមយុទ្ធនេះគឺជាឱកាសមួយដើម្បីធ្វើសមយុទ្ធនៅចម្ងាយជិតៗនៅភាគខាងជើង ត្បូង និងខាងកើតកោះតៃវ៉ាន់ដោយផ្តោតលើការហ្វឹកហ្វឺននៃការបង្កើតយុទ្ធសាស្ត្រដែនសមុទ្រ និងផ្លូវអាកាស។ ទូរទស្សន៍នេះបានបន្ថែមថា សមយុទ្ធនេះគឺជាការព្រមាន និងការរារាំងយ៉ាងខ្លាំងប្រឆាំងនឹងកងកម្លាំងផ្តាច់ខ្លួនទាមទារឯករាជ្យរបស់តៃវ៉ាន់ ហើយវាក៏ជាសកម្មភាពចាំបាច់មួយដើម្បីការពារអធិបតេយ្យជាតិ និងរក្សាឯកភាពជាតិផងដែរ។

តៃវ៉ាន់បានថ្កោលទោសចិនចំពោះការធ្វើសមយុទ្ធនេះទោះជាមកដល់ពេលនេះតៃវ៉ាន់មិនទាន់ឃើញមានសញ្ញានៃសមយុទ្ធបាញ់គ្រាប់ពិតនៅឡើយក៏ដោយ។ សមយុទ្ធនេះបានកើតឡើងបន្ទាប់ពីមានការកើនឡើងនូវវោហាសាស្ត្ររបស់ចិនប្រឆាំងនឹងលោក ឡៃ ប្រធានាធិបតីតៃវ៉ាន់ និងតាមពីក្រោយដំណើរទស្សនៈកិច្ចនៅអាស៊ីរបស់រដ្ឋមន្ត្រីការពារជាតិអាម៉េរិកលោក ភីត ហេកសិត កាលពីថ្ងៃចុងសប្ដាហ៍មកនេះដោយលោកបានរិះគន់ទីក្រុងប៉េកាំងជារឿយៗជុំវិញជម្លោះនៅច្រកសមុទ្រតៃវ៉ាន់។

លោក ឈិន យីហ្វេន អ្នកវិភាគនៅសាកលវិទ្យាល័យមួយនៅតៃវ៉ាន់បានព្រមានថា ចិននឹងធ្វើលំហាត់យោធាបន្ថែមទៀតនៅជុំវិញតៃវ៉ាន់នៅឆ្នាំនេះ ហើយថា ចិនកំពុងផ្ញើសារដ៏ម៉ឺងម៉ាត់មួយទៅកាន់រដ្ឋមន្ត្រីការពារជាតិអាម៉េរិក ហើយថារដ្ឋបាលលោក ដូណាល់ ត្រាំ ប្រធានាធិបតីអាម៉េរិកត្រូវស្វែងយល់អំពីស្ថានភាពបន្ទាន់ និងកំពុងវិវឌ្ឍន៍នៅតំបន់អាស៊ីបូព៌ា៕

ប្រែសម្រួល៖ ប៉ិច ស៊ីនួន