ទិន្នន័យផ្លូវការពី រដ្ឋាភិបាលចិន បានបង្ហាញថា ពាណិជ្ជកម្មអន្តរជាតិលើទំនិញ និងសេវាកម្មរបស់ប្រទេសចិន បានឈានដល់ ៥០៨ពាន់លានដុល្លារអាមេរិក នៅក្នុងខែកុម្ភៈ កើនឡើង ១៤% ធៀបនឹងពេលដូចគ្នា កាលពីឆ្នាំមុន។ នេះបើយោងតាមការចេញផ្សាយដោយ សារព័ត៌មានអន្តរជាតិ CCTV នៅថ្ងៃនេះ។

ជាក់ស្តែង ការនាំចេញទំនិញរបស់ប្រទេសចិន មានចំនួនប្រហែល ២៤៦ពាន់លានដុល្លារអាមេរិក ធៀបនឹងការនាំចូលទំនិញចំនួនប្រហែល ១៨២ពាន់លានដុល្លារ ក្នុងខែកុម្ភៈ ដែលបណ្តាលឱ្យមានអតិរេកពាណិជ្ជកម្មប្រមាណ ៦៤ពាន់លានដុល្លារអាមេរិក។

នៅក្នុងពាណិជ្ជកម្មសេវាកម្មរបស់ចិន តម្លៃពាណិជ្ជកម្មនៃសេវាកម្មធ្វើដំណើរមានចំនួនប្រហែល ២៤ពាន់លានដុល្លារ, សេវាកម្មដឹកជញ្ជូនមានចំនួន ២១ពាន់លានដុល្លារ និងទូរគមនាគមន៍ កុំព្យូទ័រ និងសេវាកម្មព័ត៌មាន មានតម្លៃ  ៨ពាន់លានដុល្លារ) ក្នុងខែកុម្ភៈ។

ដោយឡែក សម្រាប់រយៈពេល ២ខែដំបូងនៃឆ្នាំនេះ ប្រទេសចិន ទទួលបានអតិរេកពាណិជ្ជកម្មចំនួន ប្រហែល ១១២ពាន់លានដុល្លារអាមេរិក។សូមរម្លឹកថា ការិយាល័យស្ថិតិជាតិចិន បានបង្ហាញថា ផលិតផលក្នុងស្រុកសរុបរបស់មហាអំណាចសេដ្ឋកិច្ច បានកើនឡើង ៥% ក្នុងឆ្នាំ ២០២៤ ខណៈពាណិជ្ជកម្មក្រៅប្រទេស បន្តគាំទ្រដល់កំណើនសេដ្ឋកិច្ចចិន ដោយការនាំចូល និងនាំចេញទំនិញសរុបបានកើនឡើង ៥% ក្នុងឆ្នាំ ២០២៤កន្លងទៅនេះ៕

អត្ថបទ៖ ងួន សុភ័ត្រ្តា រូបភាព៖ ឯកសារ