ប្រធានាធិបតីប្រទេសប៉ូឡូញ នៅថ្ងៃអង្គារ(១៨កុម្ភៈ) បាននិយាយថា មន្ត្រីសហរដ្ឋអាមេរិក បានធានាចំពោះលោកថា រដ្ឋាភិបាលទីក្រុងវ៉ាស៊ីនតោន គ្មានបំណងបន្ថយចំនួនយោធានៅតំបន់ភាគខាងកើតសហភាពអ៊ឺរ៉ុបឡើយ។ 

ការលើកឡើងរបស់ប្រធានាធិបតីប៉ូឡូញខាងលើនេះ ធ្វើឡើងខណៈលោកផ្តល់សេចក្តីថ្លែងការណ៍ទៅកាន់អ្នកសារព័ត៌មានបន្ទាប់ពីជួបជាមួយលោកKeith Kelloggប្រេសិតរបស់លោកប្រធានាធិបតីអាមេរិកDonald Trumpទទួលបន្ទុកកិច្ចការប្រទេសអ៊ុយក្រែន។ 

ការពិតអំពីតួនាទីរបស់រដ្ឋាភិបាលទីក្រុងវ៉ាស៊ីនតោននៅក្នុងការធានាសន្តិសុខសហភាពអ៊ឺរ៉ុប ត្រូវបានប្រែប្រួលកាលពីសប្តាហ៍មុន ហើយលោក Pete Hegseth រដ្ឋមន្ត្រីក្រសួងការពារជាតិអាមេរិក បានថ្លែងនៅក្នុងសន្និសីទសារព័ត៌មាននៅក្នុងប្រទេសប៉ូឡូញថា សម្ព័ន្ធមិត្តអង្គការណាតូ មិនអាចសន្មតថា សហរដ្ឋអាមេរិក នឹងមានវត្តមាននៅអឺរ៉ុប ជារៀងរហូតនោះទេ។

យ៉ាងណាក៏ដោយ, ក្រោយកិច្ចប្រជុំជាមួយលោកKellogg នៅថ្ងៃច័ន្ទ និងលោក Hegseth នៅថ្ងៃសុក្រ(១៤កុម្ភៈ), លោក Andrzej Duda ប្រធានាធិបតីប៉ូឡូញ ស្វែងរកការធានាឡើងវិញអំពីផែនការរបស់រដ្ឋាភិបាលទីក្រុងវ៉ាស៊ីនតោន។ 

លោក Kellogg នឹងធ្វើដំណើរទៅប្រទេសអ៊ុយក្រែន ដើម្បីជួបជាមួយ លោក Volodymyr Zelenskiy ប្រធានាធិបតីអ៊ុយក្រែន នៅទីក្រុងKyiv ក្រោយទស្សនកិច្ចរបស់លោកទៅប្រទេសប៉ូឡូញ។

ប្រែសម្រួល៖ណាវ័ន្ត