មហោស្រពសិល្បៈដំណើរខ្មែរលើកទី១ ឆ្នាំ២០២៤ រៀបចំដោយក្រុមដំណើរខ្មែរ កំពុងត្រៀមបើកឱ្យសាធារណជនចូលរួមទស្សនាដោយស៊េរី រយៈពេល៣ថ្ងៃជាប់គ្នា ចាប់ពីថ្ងៃទី១០ ដល់ថ្ងៃទី១២ ខែធ្នូ ឆ្នាំ២០២៤ ខាងមុខនេះ។

ពិសេសមិនធ្លាប់មានពីមុនមកឡើយ ដោយមហោស្រពសិល្បៈដំណែលខ្មែរលើកទី១ ឆ្នាំ២០២៤ ក្រោមប្រធានបទ «ព្រលឹងសិល្បៈចម្រៀង និងភាពយន្តខ្មែរ» កំពុងត្រៀមប្រារព្ធឡើងរយៈពេល៣ថ្ងៃជាប់គ្នា ចាប់ពីថ្ងៃទី១០ ដល់ថ្ងៃទី១២ ខែធ្នូ ឆ្នាំ២០២៤ ក្រោមការដឹកនាំពីលោក វីរៈ វ៉ារ៉ានី ប្រធានក្រុមដំណើរខ្មែរ និងជាក្រុមយុវជនស្រាវជ្រាវមរតកចម្រៀងភាពយន្ត និងប្រវត្តិសាស្ត្រខ្មែរពីអតីតកាល។

តាមការឲ្យដឹងពីប្រធានក្រុមដំណើរខ្មែរ គោលបំណងនៃការរៀបចំមហោស្រពសិល្បៈដំណើរខ្មែរលើកទី១ ឆ្នាំ២០១៤នេះ គឺដើម្បីរំឮកអនុស្សាវរីយ៍ និងបង្ហាញឯកសារជាប្រវត្តិសាស្តដល់មហាជនខ្មែរឱ្យស្គាល់ពីភាពអស្ចារ្យនៃសិល្បៈភាពយន្ត និងចម្រៀងខ្មែរដែលធ្លាប់កើតមាន ហើយនាំយុវជនជំនាន់ថ្មីទៅស្វែងយល់ពីអតីតកាលដ៏ផូរផង់សម័យយុគមាសមុនឆ្នាំ១៩៧៥។ សកម្មភាពនេះកំពុងរួមចំណែកចែករំលែកផ្តល់ចំណេះដឹង និងបណ្ដុះមនសិការស្នេហាវប្បធម៌ជាតិ ហើយក៏ជាពេលវេលានៃការបង្កើតទំនាក់ទំនងរវាងសិល្បកររៀមច្បង និងសិល្បករបច្ចុប្បន្ន និងផ្តល់កម្លាំងចិត្តដល់យុវជនខ្មែរជំនាន់ថ្មីឲ្យមានសេចក្ដីក្លាហានបញ្ចេញសមត្ថភាពផ្សេងៗផងដែរ។

លោក វីរៈ វ៉ារ៉ានី បានរៀបចំឲ្យមានព្រឹត្តិការណ៍ និងកម្មវិធីសំខាន់ៗជាច្រើនរួមមាន៖ ការចាក់បញ្ចាំងភាពយន្តខ្មែរសម័យយុគមាសចំនួន៥រឿង , ការតាំងពិព័រណ៍ភាពយន្ដល្បីៗសម័យយុគមាស , កម្មវិធីប្រឡងប្រជែងស្នាដៃតែងនិពន្ធរឿងខ្លីពានរង្វាន់សម្តេចក្រុមព្រះនរោត្តមចក្រពង្ស , វេទិកាជួបជុំពិភាក្សាផ្លាស់ប្តូរយោបល់លើប្រធានបទ មរតកសិល្បៈ និងការចូលរួមចែករំលែកដោយមានវត្តមានវាគ្មិនជាច្រើនរូប , ការសម្តែងផ្ទាំងទស្សនីយភាពចម្រៀងក្រោមចំណងជើង «ព្រលឹងភាពយន្តខ្មែរ» , ការប្រគំតន្ត្រីរាត្រីយុគមាស ដោយមានវត្តមានតារាកិត្តិយសល្បីៗ ក្នុងព្រះរាជាណាចក្រកម្ពុជាព្រមទាំងកម្មវិធីពិសេសពិសេសមួយចំនួនទៀត។

លោក ជៀប សុវិជ្ជា អនុប្រធាននាយកដ្ឋានសិល្បៈភាពយន្ត និងផ្សព្វផ្សាយវប្បធម៌ នៃក្រសួងវប្បធម៌និងវិចិត្រសិល្បៈ បានបង្ហាញសុទិដ្ឋិនិយម និងភាពវិជ្ជមាននៃការរៀបចំមហោស្រពនេះ ដែលលោកយល់ឃើញថា មហោស្រពសិល្បៈដំណើរខ្មែរនេះ ផ្តល់សារៈសំខាន់ដល់យុវសមិទ្ធិករ ជាពិសេសយុវជនខ្មែរជំនាន់ក្រោយឲ្យបានសិក្សាស្វែងយល់ពីឫសគល់នៃភាពយន្តរបស់ខ្លួន។សូមជម្រាបឲ្យដឹងផងដែរថា សន្និសីទសារព័ត៌មានពីកិច្ចដំណើរការមហោស្រពសិល្បៈដំណើរខ្មែរលើកទី១ លោកអ្នកអាចចូលរួមទស្សនាមហោស្រពសិល្បៈដំណើរខ្មែរ លើកទី១ ក្រោមប្រធានបទ «ព្រលឹងសិល្បៈចម្រៀង និងភាពយន្តខ្មែរ» ដោយឥតគិតថ្លៃ រយៈពេល៣ថ្ងៃជាប់គ្នា ចាប់ពីថ្ងៃទី១០ ដល់ថ្ងៃទី១២ ខែធ្នូ ឆ្នាំ២០២៤៕

អត្ថបទ៖ រ៉ាត់ ចាន់ធីតា រូបភាព៖ ឃាង ទូច