ថ្ងៃអាទិត្យ ទី០៨ ខែកញ្ញា ឆ្នាំ២០២៤
ថ្ងៃអាទិត្យ ទី០៨ ខែកញ្ញា ឆ្នាំ២០២៤
លោក Volodymyr Zelenskiy ប្រធានាធិបតីអ៊ុយក្រែនបាននិយាយនៅថ្ងៃអាទិត្យ(២៥កុម្ភៈ)ថា យោធាអ៊ុយក្រែន៣១,០០០នាក់ ត្រូវបានសម្លាប់ចាប់តាំងពីការឈ្លានពានពេញទម្រង់ពីសំណាក់ប្រទេសរុស្ស៊ីលើប្រទេសអ៊ុយក្រែនបានកើតឡើងកាលពី២ឆ្នាំមុន។ នេះជាតួលេខលើកដំបូងក្នុងរយៈពេលជាង១ឆ្នាំចុងក្រោយនេះដែលយោធាអ៊ុយក្រែនស្លាប់ក្នុងសង្គ្រាម។
លោក Zelenskiy បានថ្លែងនៅក្នុងសន្និសីទសារព័ត៌មានក្នុងទីក្រុងកៀវថា លោកមិនអាចបង្ហាញតួលេខយោធារងរបួសឡើយ ដោយសារបើប្រកាសទៅនឹងអាចជួយដល់ការរៀបចំផែនការរបស់យោធារុស្ស៊ី។
«យោធាអ៊ុយក្រែន៣១,០០០នាក់ ត្រូវបានសម្លាប់នៅក្នុងសង្គ្រាមនេះ»។ លោក Zelenskiy ថ្លែងក្នុងសន្និសីទសារព័ត៌មានក្នុងទីក្រុងKyiv។
ប្រទេសអ៊ុយក្រែន មិនបានប្រកាសប្រាប់ពីតួលេខយោធារបស់ខ្លួនស្លាប់នៅក្នុងសង្គ្រាមចាប់តាំងពីចុងឆ្នាំ២០២២ នៅពេលលោកMykhailo Podolyak ជំនិតប្រធានាធិបតី បានលើកឡើងថា យោធាអ៊ុយក្រែន១៣,០០០នាក់ ស្លាប់ចាប់តាំងពីការឈ្លានពានកើតឡើងនៅថ្ងៃ២៤កុម្ភៈឆ្នាំ២០២២។
ខាងភាគីរុស្ស៊ី មិនដែលបង្ហាញពីតួលេខយោធាស្លាប់ឡើយ ដោយចាត់ទុកថា ជាកិច្ចការសម្ងាត់រដ្ឋ។
អត្ថបទ៖ណាវ័ន្ត