មានការរាយការណ៍ពីករណីផ្ទុះអាវុធនៅផ្សារទំនើបនៅកណ្តាលទីក្រុងបាងកក។ នេះបើតាមការឱ្យដឹងពីមន្ត្រីប៉ូលីសថៃ។ 

ប៉ូលីសថៃ បានប្រាប់សារព័ត៌មានអង់គ្លេស BBC ឱ្យដឹងថា ពួកគេកំពុងឆ្ពោះទៅកាន់ផ្សារទំនើប Siam Paragon និងមិនទាន់អាចបញ្ជាក់បាននៅឡើយទេថា មានអ្នករងរបួសឬយ៉ាងណានោះ។ 

វីដេអូនៅលើប្រព័ន្ធផ្សព្វផ្សាយសង្គមមុននេះ បានបង្ហាញឱ្យឃើញអ្នកដើរទិញឥវ៉ាន់រត់ចេញពីផ្សារទំនើប ដែលចាប់តាំងពីពេលនោះមកត្រូវបានគេរាយការណ៍ថា ច្រកចូលទាំងអស់ត្រូវបានបិទ។ 

ស្របគ្នានៅលើបណ្តាញសង្គមអនឡាញ ក៏មានអ្នកបង្ហោះរូបភាពវីដេអូពីទិដ្ឋភាពនៅក្នុងផ្សារទំនើបផងដែរ។ ក្នុង​វីដេអូ​មួយ សំឡេង​ខ្លាំងៗ​៤ដង​ដែល​ដូច​ជា​សម្លេង​បាញ់​កាំភ្លើង ​អាច​ឮ​យ៉ាង​ច្បាស់​នៅខាងក្នុងផ្សារទំនើបដែលមានការដើរទិញទំនិញដ៏មមាញឹក។ 

មានសាក្សីជាច្រើនបានប្រើប្រាស់បណ្តាញសង្គមរាយការណ៍ថា ពួកគេកំពុងលាក់ខ្លួននៅក្នុងហាងទំនិញ និងបន្ទប់ទឹក។ 

សារព័ត៌មានថៃ បានរាយការណ៍ថា ស្ថានីយ៍រថភ្លើងក្រោមដីនៅក្បែរនោះ ក៏បានបិទផងដែរ។ 

អត្ថបទ៖ណាវ័ន្ត