ការវាយប្រហារដោយប្រើដ្រូន លើទីក្រុងម៉ូស្គូ ប្រទេសរុស្ស៊ី នៅថ្ងៃអង្គារនេះ បានបង្កការខូចខាតតិចតួច។ យោងអាជ្ញាធរទីក្រុងម៉ូស្គូ។

លោក Sergei Sobyanin អភិបាលទីក្រុងម៉ូស្គូបាននិយាយថា មិនមានអ្នករងរបួសធ្ងន់ធ្ងរឡើយ។ ទ័ពអាកាសរបស់ប្រទេសរុស្ស៊ី បានបាញ់ទម្លាក់ដ្រូនជាច្រើន ខណៈដែលដ្រូនទាំងនោះទៅជិតទីក្រុងម៉ូស្គូ។

នៅលើបណ្តាញសង្គមអនឡាញTelegram, លោក  Sergei Sobyanin បាននិយាយថា ដ្រូនវាយប្រហារលើអាគារលំនៅដ្ឋាន២កន្លែង បង្កការខូចខាតតិចតួច។ ពលរដ្ឋត្រូវជម្លៀស រកកន្លែងមានសុវត្ថិភាព ប៉ុន្តែមកដល់ពេលនេះ គ្មាននរណាម្នាក់មានរបួសធ្ងន់ឡើយ។

លោក  Sergei បន្តថា មិនមាននរណាម្នាក់ត្រូវការសម្រាកព្យាបាលនៅមន្ទីរពេទ្យឡើយ។ ជំនួយវេជ្ជសាស្ត្រ ចាំបាច់ត្រូវបានផ្តល់ឱ្យនៅហ្នឹងកន្លែង។

ក្រសួងការពារជាតិប្រទេសរុស្ស៊ីបានលើកឡើងថា ការវាយប្រហារដោយដ្រូនលើទីក្រុងម៉ូស្គូប្រទេសរុស្ស៊ី ធ្វើឡើងដោយអ៊ុយក្រែន។

ក្រសួងការពារជាតិប្រទេសរុស្ស៊ីបាននិយាយថា«នៅព្រឹកនេះ របបដឹកនាំរដ្ឋាភិបាលទីក្រុងកៀវ បានបើកការវាយប្រហារដ្រូនភេរវកម្មលើគោលដៅជាច្រើនក្នុងទីក្រុងម៉ូស្គូ»។

ប្រទេសអ៊ុយក្រែននៅមិនទាន់មានការអត្ថាធិប្បាយណាមួយលើការអះអាងនេះនៅឡើយទេ។

ហេតុការណ៍នេះ កើតឡើងក្រោយមានករណីវាយប្រហារលើទីក្រុងកៀវ ដែលមន្ត្រីអ៊ុយក្រែនបាននិយាយថា ដ្រូនច្រើនជាង២០គ្រឿងត្រូវបានបំផ្លាញ។

ករណីវាយប្រហារលើទីក្រុងកៀវ ប្រទេសអ៊ុយក្រែន បានបណ្តាលឱ្យមនុស្សម្នាក់ស្លាប់ ហើយក៏ជាករណីវាយប្រហារលើកទី១៧លើទីក្រុងកៀវផងដែរចាប់ តាំងពីដើមខែឧសភាមក។

ប្រែសម្រួល៖ណាវ័ន្ត