ប្រទេសវៀតណាមនៅថ្ងៃព្រហស្បតិ៍(២៥ឧសភា) បានចោទប្រកាន់នាវាអង្កេតការណ៍របស់ប្រទេសចិននិងកងនាវាអម ថាបានរំលោភលើអធិបតេយ្យភាពរបស់ខ្លួន​ ហើយទាមទារថា រដ្ឋាភិបាលទីក្រុងប៉េកាំងត្រូវដកនាវាទាំងនោះចេញពីដែនទឹករបស់ប្រទេសវៀតណាម។

ប្រទេសវៀតណាមនិងប្រទេសចិនជាយូរមកហើយបានជាប់នៅក្នុងជម្លោះទឹកដីដែនទឹកដែលសំបូរទៅដោយធនធានថាមពលនៅក្នុងសមុទ្រចិនខាងត្បូង ដែលជាច្រកផ្លូវយុទ្ធសាស្ត្រមួយផ្នែកពាណិជ្ជកម្មដែលជារៀងរាល់ឆ្នាំផ្តល់ប្រាក់ចំណូលច្រើនជាង៣ទ្រីលានដុល្លារអាមេរិក។

«វៀតណាមទាមទារថា ប្រទេសចិន ជាបន្ទាន់ត្រូវដកនាវាអង្កេតការណ៍ Xiang Yang Hong 10 នាវាឆ្មាំល្បាតឆ្នេរចិន និងនាវានេសាទ ចេញពីដែនទឹករបស់ប្រទេសវៀតណាម»។ យោងលោកស្រីPham Thu Hang  អ្នកនាំពាក្យក្រសួងការបរទេសវៀតណាម ថ្លែងនៅក្នុងសេចក្តីថ្លែងការណ៍របស់រដ្ឋាភិបាល។

«ប្រទេសវៀតណាម បានទាក់ទងប្រទេសចិនជាច្រើនដងនិងបានអនុវត្តន៍វិធានការស្របតាមច្បាប់អន្តរជាតិនិងច្បាប់វៀតណាមដើម្បីធានាសិទ្ធស្របច្បាប់និងផលប្រយោជន៍របស់ប្រទេសវៀតណាម»។

ស្ថានទូតចិន ប្រចាំនៅប្រទេសវៀតាម មិនមានការឆ្លើយតបភា្លមៗណាមួយឡើយចំពោះបញ្ហានេះ។

ប្រែសម្រួល៖ណាវ័ន្ត