ប្រទេសកូរ៉េខាងជើង បានតេស្តដ្រូនវាយប្រហារក្រោមទឹកសមត្ថភាពនុយក្លេអ៊ែរ ដែលអាចបង្កើតជារលកយក្សវិទ្យុសកម្ម។ យោងសារព័ត៌មានរដ្ឋកូរ៉េខាងជើងផ្សាយនៅថ្ងៃសុក្រ(២៤មីនា)។ ស្របគ្នា ប្រទេសកូរ៉េខាងជើង បានដាក់ការស្តីបន្ទោសទៅលើសមយុទ្ធយោធារួមរវាងប្រទេសកូរ៉េខាងត្បូងនិងសហរដ្ឋអាមេរិក នាំឱ្យភាពតានតឹងនៅក្នុងតំបន់កើនឡើង។

អំឡុងពេលហ្វឹកហ្វឺនដែលបង្ហាញនៅលើទូរទស្សន៍រដ្ឋKRT, ដ្រូនថ្មីរបស់ប្រទេសកូរ៉េខាងជើង ស្ថិតនៅក្រោមទឹកនៅជម្រៅ៨០ម៉ែត្រទៅ១៥០ ម៉ែត្ររយៈពេលច្រើន ជាង៥៩ម៉ោង ហើយបំផ្ទុះនៅក្នុងទឹកជិតឆ្នេរភាគខាងកើតប្រទេសកូរ៉េខាងជើង។

ប្រព័ន្ធដ្រូន មានឈ្មោះថា Haeil ឬ tsunami អាចបំផ្លាញកងនាវា និងកំពង់ផែសំខាន់ៗដោយបង្កើតរលកយក្សវិទ្យុសកម្មដោយការបំផ្ទុះនៅក្រោមទឹក។

សារព័ត៌មានរដ្ឋកូរ៉េខាងជើងKRT ក៏បានបញ្ជាក់ដែលថា ប្រទេសកូរ៉េខាងជើង បានបាញ់មីស៊ីលនៅថ្ងៃពុធ(២២មីនា) ដូចដែលប្រទេសកូរ៉េខាងត្បូងបានរាយការណ៍ នៅមុននេះ។

ប្រែសម្រួល៖ណាវ័ន្ត