ភ្នំពេញ ៖ ក្រុមអត្តពលិករបស់ក្រសួងការពារជាតិ ដណ្តើមបានមេដាយមាសច្រើនជាងគេ ពីការប្រកួតកីឡាការ៉ាតេជ្រើសរើសជើងឯក ប្រចាំឆ្នាំ២០២២” ដែលបានរៀបចំឡើង នៅសាលការ៉ាតេ នៃសាកលវិទ្យាល័យភូមិន្ទភ្នំពេញ ។

ដែលពិធីបិទការប្រកួតកីឡាការ៉ាតេជ្រើសរើសជើងឯក ប្រចាំឆ្នាំ២០២២នេះ មានការអញ្ជើញសំណាក់ឯកឧត្តម សាមឺឌី ស៊ីវឌ្ឍនា អនុប្រធានសហព័ន្ធកីឡាការ៉ាតេកម្ពុជា និងជាអនុប្រធានសហព័ន្ធការ៉ត អាស៊ីអាសគ្នេយ៍តំណាងលោកអគ្គបណ្ឌិតសភាចារ្យ អូន ព័ន្ធមុន្នីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោក ម៉ៅ សុផល អគ្គលេខាធិការរង នៃក្រុមប្រឹក្សាកីឡាក្រសួងមហាផ្ទៃ។

បើតាមរបាយការណ៍របស់គណកម្មការរៀបចំការប្រកួតបានអោយដឹងថា ក្រុមកីឡាករ-កីឡាការិនីកីឡាការ៉ាតេក្រសួងការពារជាតិដណ្តើមមេដាយ១៩ គ្រឿង ក្នុងនោះមេដាយមាសចំនួន ១០ គ្រឿង មេដាយប្រាក់ ៥ គ្រឿង និងមេដាយសំរិទ្ធ ៤ គ្រឿង ក្រុមកីឡាករ-កីឡាការិនីកីឡាការ៉ាតេក្រសួងសេដ្ឋកិច្ចដណ្តើមមេដាយ ១៣ គ្រឿង មេដាយមាសចំនួន ៦ គ្រឿង មេដាយប្រាក់ ១ គ្រឿង និងមេដាយសំរិទ្ធ ៦គ្រឿង ក្រុមកីឡាករ-កីឡាការិនីកីឡាការ៉ាតេក្លិបហនុមានដណ្តើមមេដាយ២២ គ្រឿង មេដាយមាសចំនួន ៥ គ្រឿង មេដាយប្រាក់ ៩ គ្រឿង និងមេដាយសំរិទ្ធ ៨ គ្រឿង និងក្រុមកីឡាករ-កីឡាការិនីកីឡាការ៉ាតេក្រសួងមហាផ្ទៃដណ្តើមមេដាយ១៤ គ្រឿង មេដាយមាសចំនួន ៤ គ្រឿង មេដាយប្រាក់ ៤ គ្រឿង និងមេដាយសំរិទ្ធ ៦ គ្រឿង។

សូមជម្រាប់ថា ការប្រកួតកីឡាការ៉ាតេជ្រើសរើសជើងឯក ប្រចាំឆ្នាំ២០២២” នៅរាជធានីភ្នំពេញចាប់ផ្តើមពីថ្ងៃទី ៣ដល់ថ្ងៃទី ៥  ខែកុម្ភៈ ឆ្នាំ២០២៣ មានក្លិបកីឡាការ៉ាតេចំនួន ២១ចូលរួមដោយមានកីឡាករ-កីឡាការិនី២៤៨នាក់នៅសាលប្រជុំសាកលវិទ្យាល័យភូមិន្ទភ្នំពេញ រៀបចំដោយសហព័ន្ធកីឡាការ៉ាតេកម្ពុជា ក្រោមការប្រើប្រាស់ថវិកាឧបត្ថម្ភប្រចាំឆ្នាំក្រសួងអប់រំ យុវជន និងកីឡា៕

អត្ថបទ និងរូបភាព៖ សារ៉ាន ទីងី