ប្រទេសរុស្ស៊ី បានដោះលែងពលរដ្ឋអ៊ុយក្រែន២១៥នាក់ដែលរុស្ស៊ីបានចាប់ឃុំខ្លួនក្រោយសមរភូមិដណ្តើមកាន់កាប់ទីក្រុងMariupol នៅដើមឆ្នាំនេះ។ នេះបើតាមការអោយដឹងពីមន្ត្រីជាន់ខ្ពស់ម្នាក់នៅទីក្រុងKyiv នៅថ្ងៃពុធ(២១កញ្ញា)។

ប្រធានការិយាល័យប្រធានាធិបតីអ៊ុយក្រែន លោក Andriy Yermak បាននិយាយថា អ្នកទោសដែលបានដោះលែងរួមមានមេបញ្ជាការ និងមេបញ្ជាការរងរបស់ក្រុមកងវរសេនាតូចAzov ដែលជាក្រុមច្បាំងយ៉ាងសកម្មក្នុងសង្គ្រាមរុស្ស៊ីនៅអ៊ុយក្រែន។

ការដោះលែងពលរដ្ឋអ៊ុយក្រែននេះ ជារឿងដែលនឹកស្មានមិនដល់ចាប់តាំងពីក្រុមបំបែកខ្លួនគាំទ្ររុស្ស៊ីកាលពីខែមុន បាននិយាយថា នឹងមានការកាត់ទោសក្រុមកងវរសេនាតូចAzov ។ ក្រុមកងវរសេនាតូចAzov មួយនេះត្រូវបានរុស្ស៊ីចាត់ទុកថាជាក្រុមNazis ប៉ុន្តែអ៊ុយក្រែនបានបដិសេធការចោទប្រកាន់។

​​នៅក្នុងសេចក្តីថ្លែងការណ៍ ប្រធានការិយាល័យប្រធានាធិបតីអ៊ុយក្រែន លោក Andriy Yermak  បានលើកឡើងថា អ្នកទោសដោះលែងមានវរសេនីយ៍ទោDenys Prokopenko  និងអនុប្រធានលោកSvyatoslav Palamar នៅក្នុងក្រុមAzov។

Yermak បានបន្តថា ជាការឆ្លើយតប រដ្ឋាភិបាលអ៊ុយក្រែនបានដោះលែងអ្នកទោសរុស្ស៊ី៥៥នាក់វិញ រួមទាំងលោក Viktor Medvedchuk មេដឹកនាំគណបក្សគាំទ្ររុស្ស៊ី។

ប្រែសម្រួល៖ណាវ័ន្ត