ថ្ងៃសុក្រ ទី២៦ ខែមេសា ឆ្នាំ២០២៤
ថ្ងៃសុក្រ ទី២៦ ខែមេសា ឆ្នាំ២០២៤
តុលាការនៅប្រទេសថៃបានអនុញ្ញាតឲ្យមេដឹកនាំចលនាបាតុកម្មប្រឆាំងនឹងរដ្ឋាភិបាល២នាក់ អាចរស់នៅក្រៅឃុំជាបណ្ដោះអាសន្ន ជាថ្នូរនឹងការបង់ប្រាក់ធានាសុំនៅក្រៅឃុំ។ អ្នកទាំង២ជាប់ឃុំអស់ជាច្រើនសប្ដាហ៍កន្លងមកហើយ ពាក់ព័ន្ធនឹងសំណុំរឿងចោទប្រកាន់ថាពួកគេបាននិយាយប៉ះពាល់ដល់ព្រះកិត្តិនាមរបស់ព្រះមហាក្សត្រ។
ជនជាប់ចោទទាំង២នាក់ ម្នាក់អាយុ២២ឆ្នាំ និងម្នាក់ទៀតអាយុ៣២ឆ្នាំ ត្រូវបានតុលាការយល់ព្រមឲ្យនៅក្រៅឃុំ ដោយភ្ជាប់ជាមួយលក្ខខណ្ឌមួយចំនួនដូចជា៖ មិនអនុញ្ញាតឲ្យពួកគេចាកចេញទៅប្រទេសដទៃ, ពួកគេត្រូវបង្ហាញខ្លួនពេលតុលាការកោះហៅ, ត្រូវឈប់និយាយប៉ះពាល់ព្រះមហាក្សត្រ និងឈប់ធ្វើសកម្មភាពទាំងឡាយណាដែលអាចបង្កអស្ថិរភាពសង្គម។
តាមពិត ពួកគេទាំង២នាក់នេះបានស្នើសុំនៅក្រៅឃុំជាច្រើនដងរួចមកហើយ ពាក់ព័ន្ធនឹងសំណុំរឿងចោទប្រកាន់កាលពីឆ្នាំ២០២០។ កាលនោះ ពួកគេដឹកនាំចលនាបាតុកម្មដើម្បីទាមទារការធ្វើកំណែទម្រង់របបរាជានិយម។
កាលពីសប្ដាហ៍មុន, មេដឹកនាំចលនាបាតុកម្មម្នាក់ទៀត អាយុ២២ឆ្នាំ (ដែលចេញមុខគាំទ្រអ្នកទាំង២ខាងលើនេះដល់មុខរបងពន្ធនាគារ) ត្រូវបានតុលាការអនុញ្ញាតឲ្យបង់លុយសុំនៅក្រៅឃុំ។ រូបគេក៏ជាប់ចោទពីបទនិយាយប៉ះពាល់ព្រះមហាក្សត្រដូចអ្នកទាំង២ផងដែរ៕
ប្រែសម្រួល៖អនសំអាង