វ៉ាក់សាំង Sinovac ចំនួន ១,៥លានដូស ជាផលិតផលរបស់សាធារណៈរដ្ឋប្រជាមានិតចិន ដែលទើបមកដល់កម្ពុជានៅព្រឹកមិញនេះ ត្រូវបានលោកជំទាវ យក់ សម្បត្តិ រដ្ឋលេខាធិការក្រសួងសុខាភិបាលឲ្យដឹងថា មានតម្លៃ ១០ដុល្លារសហរដ្ឋអាមេរិកក្នុងមួយដូស មានន័យថា កម្ពុជាត្រូវចំណាយ ១៥លានដុល្លារ សម្រាប់ការទិញលើកនេះ។

លោកជំទាវបញ្ជាក់បន្ថែមថា ការទិញនេះប្រើប្រាស់ថវិកាជាតិទាំងស្រុង ហើយក្រុមអាទិភាពសម្រាប់ការចាក់វ៉ាក់សាំងនេះគឺ មន្ត្រីរាជការ និងចាស់ជរា ពិសេសអ្នកមានមូលដ្ឋាននៅរាជធានីភ្នំពេញ កណ្ដាល និងខេត្តព្រះសីហនុ ដែលកំពុងគំរាមកំហែងខ្លាំង។

រដ្ឋលេខាធិការដដែលបង្ហាញសុទិដ្ឋិនិយមខ្ពស់ថា យុទ្ធនាការចាក់វ៉ាក់សាំង Sinovac នឹងជួយកាត់បន្ថយហានិភ័យពីជំងឺដ៏ប្រល័យ កូវីដ-១៩ បានមួយផ្នែកទៀត៕