ថ្ងៃសុក្រ ទី២៦ ខែមេសា ឆ្នាំ២០២៤
ថ្ងៃសុក្រ ទី២៦ ខែមេសា ឆ្នាំ២០២៤
អាជ្ញាធរ បានសម្រុកជួសជុលគ្រឹះ និងអ៊ុតកៅស៊ូលើផ្លូវ២៩ខ្សែឡើងវិញ នៅតាមបណ្តាខណ្ឌមួយចំនួន នៅក្នុងរាជធានីភ្នំពេញ។ ផ្លូវទាំង ២៩ខែ្សនេះ ជួសជុលឡើងវិញ បន្ទាប់ពីរងការខូចខាតដោយសារជំនន់ទឹកភ្លៀង កាលពីអំឡុងរដូវវស្សាកន្លងទៅ។
ផ្លូវចំនួន ២៩ខែ្ស ត្រូវបានអាជ្ញាធររាជធានីភ្នំពេញ សម្រុកជួសជុលគ្រឹះ និងអ៊ុតកៅស៊ូឡើងវិញបន្ទាប់ពីរងការខូចខាតដោយសារជំនន់ទឹកភ្លៀង កាលពីអំឡុងរដូវវស្សាកន្លងទៅ។ ឯកឧត្តម ឃួង ស្រេង អភិបាលរាជធានីភ្នំពេញ បានអោយដឹងថា ផ្លូវទាំង២៩ខ្សែនោះរួមមាន ក្នុងខណ្ឌដូនពេញ មានចំនួន១៦ខ្សែ ខណ្ឌទួលគោក មានចំនួន៧ខ្សែ ខណ្ឌច្បារអំពៅ មានចំនួន២ខ្សែ នៅខណ្ឌមានជ័យ មានចំនួន២ខ្សែ ខណ្ឌឫស្សីកែវ មានចំនួន១ខ្សែ និងខណ្ឌចំការមន មានចំនួន១ខ្សែ។
ឯកឧត្តម បានបន្ថែមថា ជាក់ស្ដែងនៅក្នុងពេលនេះ ក្រុមការងារកំពុងជួសជុលថែទាំផ្លូវដែលទទួលរងការខូចខាតយ៉ាងសកម្មទាំងការជួសជុលគ្រឹះនិងការអ៊ុតកៅស៊ូឱ្យបានស្អាតឡើងវិញ ដើម្បីដាក់ឲ្យ ប្រជាពលរដ្ឋបានងាយស្រួលក្នុងការធ្វើដំណើរទៅមក ហើយដូចជាជាការលើកសោភ័ណភាពរាជធានីភ្នំពេញឲ្យមានភាពស្រស់ស្អាតផងដែរ។
គួរបញ្ជាក់ថា ជំនន់ទឹកភ្លៀងកាលពីចុងឆ្នាំ២០២០ បានធ្វើអោយខណ្ឌចំនួននៅក្នុងរាជធានីភ្នំពេញរងផលប៉ះពាល់ ។ ក្រៅពីប៉ះពាល់ផ្ទះសំបែង ស្រែចម្ការរបស់ប្រជាពលរដ្ឋ ក្នុងនោះក៏មានការខូចខាតប្រព័ន្ធលូ ប្រឡាយបង្ហូរទឹក និងផ្លូវថ្នល់ជាដើម៕
អត្ថបទ និងរូបភាព៖ សន រដ្ឋា
.jpg)
