ថ្ងៃច័ន្ទ ទី០៦ ខែឧសភា ឆ្នាំ២០២៤
ថ្ងៃច័ន្ទ ទី០៦ ខែឧសភា ឆ្នាំ២០២៤
ព្រឹទ្ធសភាអាមេរិកបានអនុម័តកញ្ចប់ថវិកាជំនួយចំនួន ៩៥ ពាន់លានដុល្លារសម្រាប់ប្រទេសអ៊ុយក្រែន អ៊ីស្រាអែល និងកោះតៃវ៉ាន់កាលពីយប់ថ្ងៃអង្គារបន្ទាប់ពីសភាតំណាងរាស្ត្រអាមេរិកបានអនុម័តកាលពីចុងសប្ដាហ៍មុន។
សមាជិកព្រឹទ្ធសភាបានបោះឆ្នោតក្នុងសំឡេង ៧៩ ទល់នឹង ១៨ ដើម្បីអនុម័តច្បាប់ថវិកាជំនួយយោធាដ៏ច្រើនសន្ធឹកសន្ធាប់នេះរហូតដល់ ៩៥ ពាន់លានដុល្លារកាលពីយប់ថ្ងៃអង្គារដែលភាគច្រើនសម្រាប់អ៊ុយក្រែន អ៊ីស្រាអែល និងតៃវ៉ាន់ និងដៃគូសហរដ្ឋអាមេរិកនៅក្នុងតំបន់ឥណ្ឌូ-ប៉ាស៊ីហ្វិក។
លោក ចូ បៃដិន ប្រធានាធិបតីអាមេរិកបាននិយាយថា លោកនឹងចុះហត្ថលេខាលើច្បាប់នេះនៅថ្ងៃពុធនេះតែម្ដង។ ច្បាប់នេះនឹងផ្តល់ថវិកាជំនួយចំនួន ៦១ ពាន់លានដុល្លារសម្រាប់អ៊ុយក្រែន ចំនួន ២៦ ពាន់លានដុល្លារសម្រាប់អ៊ីស្រាអែល និងចំនួនជាង ៨ ពាន់លានដុល្លារទៀត«សម្រាប់ទប់ទល់នឹងឥទ្ធិពលចិនកុម្មុយនិស្ត»នៅតំបន់ឥណ្ឌូប៉ាស៊ីហ្វិក។
លោក ឆឹក ស្គូមើ (Chuck Schumer) មេដឹកនាំសំឡេងភាគច្រើនខាងគណបក្សប្រជាធិបតេយ្យនៅព្រឹទ្ធសភាបាននិយាយនៅឯព្រឹទ្ធសភាថា នេះគឺជាចំណុចផ្លាស់ប្ដូរជាប្រវត្តិសាស្ត្រមួយ ហើយថា ប្រជាធិបតេយ្យនៅបស្ចិមលោកប្រហែលជាប្រឈមនឹងការគំរាមកំហែងដ៏ខ្លាំងបំផុតចាប់តាំងពីការបញ្ចប់សង្គ្រាមត្រជាក់៕
ប្រែសម្រួល៖ ប៉ិច ស៊ីនួន