ប្រធានក្រុមប្រណាំងទូកក្រសួងមហាផ្ទៃ លោក ហ៊ុល លីដា  បានបង្ហាញឆន្ទៈយ៉ាងមុះមុតថា លោកចង់ដឹកនាំកូនក្រុមរបស់ខ្លួន ចេញទៅចូលរួមព្រឹត្តិការណ៍កីឡាប៉ូលីស និងកងកម្លាំងពន្លត់អគ្គីភ័យពិភពលោក ឬ World Police and Fire Games ជាថ្មីម្តងទៀតនៅប្រទេសហូរឡង់ នាឆ្នាំ២០២១ខាងមុខនេះ ប្រសិនបើមានការអនុញ្ញាត្តិពីថ្នាក់ដឹកនាំអង្គភាពកីឡានគរបាលជាតិកម្ពុជា។

ថ្លែងប្រាប់ PNN SPORTS នាព្រឹកថ្ងទី០៥ ឧសភា ឆ្នាំ២០២០  លោក ហ៊ុល លីដា ថា បំណងចង់ចេញម្តងទៀតនេះ គឺដើម្បីការពារតំណែងមេដាយមាសដែលក្រុមខ្លួនធ្លាប់ប្រជែងបានកាលឆ្នាំ២០១៩ នៅចិន។ លោក ហ៊ុល លីដា បង្ហាញក្តីរំពឹងដែរថា ក្រុមខ្លួននឹងធ្វើកាន់តែល្អជាងមុន ដ្បិតបទពិសោធន៍ចូលរួមកាលនៅចិន ជាកត្តាជំរុញដ៏ខ្លាំងបំផុតមួយ។

«ព្រឹត្តិការណ៍ World Police and Fire Games នៅ CHENDU ពួកយើងប្រជែងបានមេដាយមាស ចឹង World Police នៅហូរឡង់ឆ្នាំក្រោយបើសិនថ្នាក់ដឹកនាំអនុញ្ញាត្តិគឺយើងចង់មែនទែនបង ព្រោះយើងជាម្ចាស់ជើងឯកកាលនៅចិន ចឹងបើទោះមិចក៏ដោយ World Police នៅហូរឡង់ឆ្នាំ គឺយើងត្រូវតែទៅ។ ខ្ញុំសង្ឃឹមថា ការចូលរួម នៅហូរឡង់នេះ គឺយើងអាចនឹងធ្វើបានល្អជាកាលនៅចិន ព្រោះកាលនៅចិន កីឡាកររបស់យើងមិនមានបទពិសោធន៍ទេ តែនៅហូរឡង់ ដឹងតែល្អហើយបង»។

គួរបញ្ជាក់ថា កាលចូលរួមព្រឹត្តិការណ៍ World Police and Fire Games នៅក្រុង CHENDU សាធារណៈរដ្ឋប្រជាមានិតចិន ក្រុមទូកក្រសួងមហាផ្ទៃ ប្រជែងបានមេដាយមាស១គ្រឿង លើប្រភេទវិញ្ញាសាទូកនាគខ្នាតអន្តរជាតិ  ចម្ងាយ ២០០ម៉ែត្រ ចំណុះ១២នាក់៕

អត្ថបទ៖ ងិន មករា