មន្ទីរបញ្ចកោណនៃសហរដ្ឋអាមេរិក បានផ្អាកបញ្ជូនមីស៊ីលការពារដែនអាកាសមួយចំនួន និងអាវុធដទៃផ្សេងទៀត ទៅប្រទេសអ៊ុយក្រែន ដោយបារម្ភថា សហរដ្ឋអាមេរិក មិនមានអាវុធទាំងអស់នេះគ្រប់គ្រាន់នៅក្នុងស្តុកអាវុធរបស់អាមេរិក។ យោងសារព័ត៌មានរ៉យទ័រផ្សាយនៅថ្ងៃអង្គារ(១កក្កដា)ដកស្រង់ប្រភពដែលស្និទ្ធិពីបញ្ហា។ 

ការផ្អាកការបញ្ជូនអាវុធមួយចំនួនទៅឱ្យរដ្ឋាភិបាលទីក្រៀវទៅតាមការសន្យារបស់រដ្ឋបាលអតីតប្រធានាធិបតីJoe Bidenកើតឡើងក្នុងប៉ុន្មានថ្ងៃថ្មីៗនេះ។ ប្រភពដដែលឱ្យដឹងថា មីស៊ីលការពារដែនអាកាសដែលប្រើបាញ់ទម្លាក់ដ្រូន និងមីស៊ីលរបស់ប្រទេសរុស្ស៊ី និងគ្រាប់ផ្លោងផ្សេងទៀត ស្ថិតនៅក្នុងចំណោមប្រភេទអាវុធដែលអាមេរិកផ្អាកការដឹកជញ្ជូនឱ្យអ៊ុយក្រែន។ 
 

តាមរយៈសារអេឡិចត្រូនិចEmail, មន្ទីរបញ្ចកោណ បានលើកឡើងថា មន្ទីរបញ្ចកោណ បានផ្តល់ជម្រើសផ្សេងៗឱ្យលោកប្រធានាធិបតីអាមេរិក Donald Trump  បន្តផ្តល់ជំនួយយោធាទៅឱ្យប្រទេសអ៊ុយក្រែន ដែលជម្រើសទាំងអស់នោះត្រូវធ្វើឡើងស្របតាមគោលបំណងបញ្ចប់សង្គ្រាមរុស្ស៊ីនៅប្រទេសអ៊ុយក្រែន។ 
 

ហើយនៅប៉ុន្មានសប្តាហ៍ចុងក្រោយនេះ រុស្ស៊ីដណ្តើមបានទឹកដីបន្ថែមទៀតជាពិសេស នៅតំបន់ Donetsk និងតំបន់Dnipropetrovskភាគខាងអាគ្នេយ៍ប្រទេសអ៊ុយក្រែន ហើយបានបង្កើនការវាយប្រហារដែនអាកាសនៅទូទាំងប្រទេសអ៊ុយក្រែន។ 

ប្រែសម្រួល៖ណាវ័ន្ត