លោកប្រធានាធិបតីអាមេរិក Donald Trump និយាយថា លោកមានការគោរពយ៉ាងខ្លាំងសម្រាប់លោកប្រធានាធិបតីចិន Xi Jinping។ ការថ្លែងដូច្នេះរបស់លោកប្រធានាធិបតីអាមេរិក Trump  បានធ្វើឡើងបន្ទាប់ពីការដាក់ពន្ធរបស់លោកលើការនាំចូលដែក និងអាលុយមីញ៉ូមទាំងអស់ទៅសហរដ្ឋអាមេរិក ចូលជាធរមាននៅថ្ងៃពុធ(១២មីនា)។ 

ប្រទេសចិន នឹងចាត់វិធានការចាំបាច់ទាំងអស់ដើម្បីការពារសិទ្ធិ និងផលប្រយោជន៍របស់ប្រទេសចិន។ យោងក្រសួងការបរទេសចិន។

ចំណាត់ការរបស់សហរដ្ឋអាមេរិក ល្មើសច្បាប់របស់អង្គការពាណិជ្ជកម្មពិភពលោក។ នេះជាការលើកឡើងរបស់អ្នកនាំពាក្យក្រសួងការបរទេសចិនលោកស្រី​Mao Ningថ្លែងក្នុងសន្និសីទសារព័ត៌មាន។ 

ការដាក់ពន្ធរបស់លោកប្រធានាធិបតីTrump បានកែប្រែសណ្តាប់ធ្នាក់ពាណិជ្ជកម្មសាកលលោកដែលងាកទៅផ្តល់ប្រយោជន៍ឱ្យអាមេរិក ហើយក៏បានបង្កើតឡើងឱ្យមានការដាក់ពន្ធតបតវិញយ៉ាងឆាប់រហ័សពីសហភាពអ៊ឺរ៉ុប។ 

ក្រុមអ្នកវិភាគ បានលើកឡើងថា ពន្ធ២៥ភាគរយទៅលើការនាំចូលដែកនិងអាលុយមីញ៉ូមទាំងអស់ទៅអាមេរិក អាចធ្វើឱ្យពន្ធលើផលិតផលផ្សេងទៀតឡើងតាមហ្នឹងមានដូចជា  ប៊ូឡុង និងកំប៉ុងសូដា។
 

ប្រែសម្រួល៖ណាវ័ន្ត