Robot ប្លែកៗនិងដូចពិតៗជាច្រើនមានទាំងមនុស្សយន្ត ឆ្កែយន្ត និង Robot ចម្អិនម្ហូប បានបង្ហាញខ្លួនក្នុងពិព័រណ៍មនុស្សយន្តពិភពលោកឆ្នាំ២០២៤ ដែលរៀបចំឡើងនៅទីក្រុងប៉េកាំង។

កម្មវិធីសន្និសីទមនុស្សយន្តពិភពលោកឆ្នាំ ២០២៤ បានចាប់ផ្តើមប្រារព្ធឡើងកាលពីថ្ងៃទី២១ ខែសីហា នៅទីក្រុងប៉េកាំង ដោយបង្ហាញពីភាពជឿនលឿនចុងក្រោយបង្អស់នៃការច្នៃប្រឌិតមនុស្សយន្តពីក្រុមហ៊ុន និងវិទ្យាស្ថានស្រាវជ្រាវកំពូលៗជាច្រើន។

ក្នុងចំណោមការតាំងពិព័រណ៍ដែលទទួលបានការចាប់អារម្មណ៍ច្រើនបំផុតនោះ ក៏មានបច្ចេកវិទ្យាទំនើបៗខ្លាំងដូចជាមនុស្សយន្តដែលអាចចម្លងទឹកមុខមនុស្សបាន Robot សុនក និង Robot ជាចុងភៅចម្អិនម្ហូបជាដើម។

លោក Liu Chujun (លីវ ឈូជុន) ជាអ្នកចូលរួមទស្សនាម្នាក់បានបង្ហាញចំណាប់អារម្មណ៍ ជាពិសេសចំពោះគុណភាព និងភាពងាយស្រួលនៃការធ្វើម្ហូបបែបចិន ដែលបម្រើដោយមេចុងភៅជារ៉ូបូត ខណៈរ៉ូបូតនេះអាចទទួលធ្វើម្ហូបតាមការកុម្ម៉ង់របស់អតិថិជនបាន សូម្បីតែកម្រិតរសជាតិដូចជាហឹរតិចឬហឹរខ្លាំង។

គួរបញ្ជាក់ថា កម្មវិធីសន្និសីទនេះនឹងប្រព្រឹត្តទៅចាប់ពីថ្ងៃទី ២១ ដល់ថ្ងៃទី ២៥ ខែសីហានៅទីក្រុងប៉េកាំង។ យោងតាមគេហទំព័រផ្លូវការរបស់កម្មវិធី បានឱ្យដឹងថាព្រឹត្តិការណ៍នេះត្រូវបានប្រារព្ធឡើងជារៀងរាល់ឆ្នាំចាប់តាំងពីឆ្នាំ ២០១៥ មក ៕
 

ប្រែសម្រួល៖ វ៉ាន់ថន