ខ្សែភាពយន្តហូលីវូដ "Mulan” ដែលផលិតតាមគំនូរជីវចលដ៏ល្បី កាលពីដំបូងគឺគ្រោងនឹងចាក់បញ្ចាំងនាអំឡុងខែមីនា ប៉ុន្តែត្រូវលើកពេលដល់ថ្ងៃទី ២៤ ខែកក្កដា ដោយសារតែជំងឺកូវីដ១៩ បានរាតត្បាតពាសពេញពិភពលោក បានបង្ខំឲ្យរោងភាពយន្តទូទាំងពិភពលោកត្រូវបិទទ្វារ។ 

នាពេលនេះផលិតកម្ម Walt Disney បានប្រកាសអំពីការលើកពេលចាក់បញ្ចាំងជាថ្មីម្ដងទៀត ដែលត្រូវលើកពេលរហូតដល់ថ្ងៃទី ២១ ខែសីហា។ ការប្រកាសរបស់ផលិតកម្ម បានធ្វើឲ្យអ្នកគ្រប់គ្រងរោងភាពយន្តខកចិត្តជាខ្លាំង ដោយសារពួកគេចង់ឲ្យខ្សែភាពយន្ត Mulan នេះជួយអូសទាញទស្សនិកជនមកកាន់រោងភាពយន្តវិញ។ 

គួរបញ្ជាក់ថាឧស្សាហកម្មរោងភាពយន្តបានរងការវាយប្រហារខ្លាំង ព្រោះតែជំងឺកូវីដ១៩ ដោយមានបុគ្គលិករាប់ម៉ឺននាក់បានបាត់បង់ការងារ ហើយរោងភាពយន្តត្រូវខ្ចីប្រាក់ធនាគារដើម្បីអាចបន្តឈរជើងបាន។ នាខែកក្កដាខាងមុខនេះ រោងភាពយន្តធំៗនៅសហរដ្ឋអាមេរិកមាន AMC Entertainment , Cinemark និង Regal Cinemas នឹងចាប់ផ្ដើមបើកដំណើរការឡើងវិញ ដោយមានចាត់វិធានការតឹងរ៉ឹងដើម្បីរក្សាសុវត្ថិភាព ដូចជាការកំណត់ចំនួនអ្នកទស្សនាក្នុងរោងនីមួយៗ, ការលាងសម្អាតជាទៀងទាត់ និងការចែកម៉ាស់សម្រាប់អ្នកទស្សនា និងបុគ្គលិកជាដើម៕

ប្រែសម្រួល៖ វ៉ាន់ថន