ការច្រៀង និងសម្តែងរួមគ្នាក្នុងពេលតែមួយនៃចាប៉ីដងវែង គឺជាផ្ទាំងទស្សនីយភាពថ្មីមួយមិនធ្លាប់មានពីមុនមកក្នុងរឿង”សុវណ្ណសាម” ដែលជាការចាប់ដៃរួមគ្នាពីសិល្បករជើងចាស់ល្បីៗ ដើម្បីលើកតម្កើន ចាប៉ីដងវែង របស់ខ្មែរ ឱ្យកាន់តែលេចធ្លោឡើង ។

នេះ ជាលើកដំបូងហើយដែលសិល្បករចាប៉ីឆ្នើមៗ ៤ រូបបានចាប់ដៃគ្នាជាមួយសិល្បករជាច្រើនរូបទៀតសម្តែងចាប៉ីរឿង « សុវណ្ណសាម » ក្រោមការរៀបចំរបស់ក្រសួងវប្បធម៌និងវិចិត្រសិល្បៈ។ ក្រុមអ្នកជំនាញចាប៉ី សុទ្ធតែបានបង្ហើបក្ដីរំពឹងថា ការច្នៃទម្រង់ថ្មីមកសម្ដែងជាក្រុម នឹងអាចបន្តអភិរក្ស និងអភិវឌ្ឍទាក់ទាញចំណាប់អារម្មណ៍មហាជន គាំទ្រមរតកសិល្បៈបូរាណមួយនេះឲ្យផុលផុសឡើងវិញ។