ក្នុងរយៈពេល ៣ត្រីមាស ដើមឆ្នាំ ២០២១នេះ ប្រទេសចិន នៅតែធ្វើបានល្អក្នុងការទាក់ទាញ លំហូរវិនិយោគពីបរទេស ដោយសម្រេចបានទឹកកប្រាក់ជាង ១២៩ពាន់លានដុល្លារអាមេរិក កើនឡើង ២៥% ធៀបនឹងពេលដូចគ្នាកាលពីឆ្នាំមុន។ នេះបើយោងតាមការចេញផ្សាយនៅថ្ងៃនេះរបស់ សារព័ត៌មាន CCTV នៅថ្ងៃនេះ។

ក្រសួងពាណិជ្ជកម្មចិន បានលើកឡើងថា លំហូរវិនិយោគពីក្រៅប្រទេសចូលមកកាន់ប្រទេសចិន បន្តកើនឡើងជាបន្តបន្ទាប់ ចាប់តាំងពី ខែមករា មកដល់ ខែកញ្ញា ដោយការវិនិយោគនៅក្នុងគ្រប់វិស័យ សម្រេចបានជាង ១២៩ពាន់លានដុល្លារ ដោយក្នុងនោះ វិស័យឧស្សាហកម្មបច្ចេកវិទ្យាទំនើប កើនឡើង ២៩% ខណៈវិស័យសេវាកម្ម មានកំណើនខ្ពស់ដល់ទៅ ២២%។

ដោយឡែក កិច្ចសហប្រតិបត្តិការវិនិយោគរបស់បណ្តាប្រទេសក្នុងគំនិតផ្តួចផ្តើមខ្សែក្រវ៉ាត់និងផ្លូវ មានកំណើនវិជ្ជមាន ៣១% និងការវិនិយោគពីអាស៊ាន មកកាន់ចិន កើនឡើង ៣១% ដូចគ្នា។

សូមរម្លឹកដែរថា កាលពីឆ្នាំ ២០២០ ការវិនិយោគដោយផ្ទាល់ពីបរទេស របស់ប្រទេសចិន បានកើន ៦% មកដល់ ១៥៥ពាន់លានដុល្លារ ដោយមានសហគ្រាសវិនិយោគដោយបរទេសថ្មី ជិត ៤ម៉ឺនកន្លែង៕

អត្ថបទ៖ ងួន សុភ័ត្រ្តា និងរូបភាពឯកសារ