ក្នុងសេចក្ដីប្រកាសព័ត៌មានប្រចាំថ្ងៃរបស់ ក្រសួងសុខាភិបាលចេញផ្សាយនាម៉ោង៧ព្រឹក ថ្ងៃទី១២ ធ្នូនេះបានបង្ហាញថា កម្ពុជារកពុំឃើញករណីវិជ្ជមានថ្មីឡើយ សម្រាប់សំណាកតេស្តដែលបានធ្វើការពិនិត្យរួចរាល់ក្នុងថ្ងៃទី១១ ធ្នូកន្លងទៅ។ នេះជាថ្ងៃដំបូងហើយ ដែលពុំមានករណីវិជ្ជមានថ្មី គិតចាប់ពីថ្ងៃចាប់ផ្ដើមនៃព្រឹត្តិការណ៍២៨វិច្ឆិកាមក។

សេចក្ដីប្រកាសព័ត៌មានដដែលបង្ហាញថា ក្រុមការងារមន្ទីរពិសោធន៍បានធ្វើតេស្តអ្នកពាក់ព័ន្ធព្រឹត្តិការណ៍២៨វិច្ឆិកាសរុបចំនួន ៨៣៩សំណាក ហើយឲ្យលទ្ធផលអវិជ្ជមានទាំងអស់។

គិតមកទល់ពេលនេះ កម្ពុជាមានអ្នកជំងឺកំពុងសម្រាកព្យាបាលចំនួន ៥០នាក់ ក្នុងនោះមាន ៤០នាក់ជាអ្នកពាក់ព័ន្ធនឹងព្រឹត្តិការណ៍២៨វិច្ឆិកា។

ក្រសួងក៏បានអញ្ជើញអ្នកពាក់ព័ន្ធព្រឹត្តិការណ៍២៨វិច្ឆិកា ដែលបានធ្វើតេស្តលើកទី២កន្លងមក ឲ្យទៅធ្វើតេស្តលើកទី៣នៅថ្ងៃទី១២ ធ្នូនេះផងដែរ។ ក្នុងនោះមានទីតាំងយកសំណាកក្រសួងមហាផ្ទៃ ពហុកីឡដ្ឋានជាតិ និងនៅតាមមន្ទីរសុខាភិបាលខេត្តពាក់ព័ន្ធនានា៕

អត្ថបទ៖ ក្រុមការងារភីអិនអិន