ការជិះក្របី-សេះប្រណាំងដែលជាប្រពៃណីដ៏យូរលង់មួយរបស់អ្នកស្រុកវិហារសួគ៌ ក្នុងស្រុកខ្សាច់​កណ្ដាល​ ខេត្ត​កណ្ដាល ដែល​និយម​ធ្វើ​ឡើងក្នុងរដូវបុណ្យភ្ជុំ​បិណ្ឌ បាន​វិល​ត្រឡប់​មកជាថ្មី ក្រោយពីបានខកខាន​រៀបចំ​អស់​រយៈពេល​ពីរឆ្នាំដោយសារជំងឺរាតត្បាតកូវីដ១៩។ ​

កាលពីថ្ងៃអាទិត្យកន្លងទៅនេះ មានមនុស្សរាប់រយនាក់បានជួបជុំគ្នានៅឯ​វត្ត​វិហារសួគ៌ ស្ថិត​ក្នុងស្រុកខ្សាច់កណ្ដាល ខេត្ត​កណ្ដាល​ ដើម្បី​ទស្សនា​ការ​ប្រណាំងក្របី-សេះ និង​ការបោកចំបាប់ ដោយឆ្នាំនេះមានក្របី និង​សេះ​​ប្រមាណ ៦០​ក្បាលបានចូលរួមប្រណាំង ដោយមានការតុបតែងយ៉ាងទាក់ទាញ។

ការជិះក្របី-សេះប្រណាំង និងការបោកចំបាប់ ក្នុងអំឡុងពិធីបុណ្យភ្ជុំបិណ្ឌនេះ បាន​ក្លាយជា​ប្រពៃណី​ដ៏​យូរ​លង់​មួយ​របស់​អ្នកស្រុកវិហារសួគ៌ ប៉ុន្តែ​ត្រូវបានខកខានរៀបចំឡើងអស់រយៈពេលពីរឆ្នាំ ក្រោយ​ពី​មាន​ការ​ផ្ទុះ​ជំងឺរាតត្បាតកូវីដ១៩។ ជារៀងរាល់ឆ្នាំនៅថ្ងៃទី១៥រោច ខែភទ្របទ ត្រូវ​​​​​​នឹងថ្ងៃភ្ជុំបិណ្ឌ​ អ្នកស្រុក អ្នកភូមិវិហារសួគ៌តែងតែប្រារព្ធធ្ធើពិធីជិះក្របីប្រណាំងនិងបោកចំបាប់ដោយមានមនុស្សម្នាចូលរួមក្នុងពិធីយ៉ាងច្រើនកុះករ ហើយពិធីនេះធ្វើឡើងក្នុង បរិវេណវត្ពព្រះវិហារសួគ៌តែម្ដង។

នៅក្នុងវត្តឯណោះវិញ ក្នុងអំឡុងពិធីបុណ្យភ្ជុំបិណ្ឌនេះ ប្រជាពលរដ្ឋ​បាន​មមាញឹក​ក្នុងការ​យក​ចង្ហាន់ប្រគេនព្រះសង្ឃជាមួយ​ម្ហូបអាហារ​​ចម្អិន​មក​ពី​ផ្ទះ ដើម្បី​ឧទ្ទិស​ទៅកាន់សាច់ញាតិដែលបាន​ចែកឋាន​ទៅ។

ពិធីបុណ្យភ្ជុំបិណ្ឌ គឺជាពិធីបុណ្យបែបព្រះពុទ្ធសាសនាដែលប្រជារាស្ដ្រទូទាំងកម្ពុជា តែងតែប្រារព្ធមិនដែលអាក់ខានឡើយ គឺចាប់ពីថ្ងៃ១រោច រហូតដល់ថ្ងៃ១៥រោច ខែភទ្របទ មានរយៈពេល១៥ថ្ងៃ ដែលគេ​ហៅថាបិណ្ឌ១, បិណ្ឌ២ និងថ្ងៃបញ្ចប់ គឺជាថ្ងៃ “ភ្ជុំបិណ្ឌ”។ ជារៀងរាល់ឆ្នាំ នៅពេលដល់ថ្ងៃខែត្រូវប្រារព្ធពិធីបុណ្យភ្ជុំបិណ្ឌ ប្រជាជន​ខ្មែរតែងតែធ្វើដំណើរទៅជួបជុំសាច់ញាតិ ជាពិសេសឪពុកម្ដាយ ក៏ដូចជារៀបចំម្ហូបអាហារ បាយសម្ល ចង្ហាន់យកទៅប្រគេនព្រះសង្ឃគង់នៅវត្តអារាម៕

ប្រែសម្រួល៖ វ៉ាន់ថន