ថ្ងៃច័ន្ទ ទី២០ ខែឧសភា ឆ្នាំ២០២៤
ថ្ងៃច័ន្ទ ទី២០ ខែឧសភា ឆ្នាំ២០២៤
ការប្រកួត Miss Grand Cambodia 2024 កំពុងចាប់ផ្តើម កញ្ញា ប៊ី សុធារី គ្មានក្តីរំពឹងអ្វីសម្រាប់ការប្រកួតនេះឡើយ មានតែមហិច្ឆិតាដណ្តើមមកុដឱ្យខានតែបាន ដើម្បីតំណាងកម្ពុជាលើឆាកអន្តរម្តងទៀត។
តាមការប្រកាសឱ្យដឹងកាលពីពេលថ្មីៗកន្លងទៅ កម្មវិធី Miss Grand Cambodia 2024 ជាសមរភូមិចុងក្រោយបង្អស់របស់ កញ្ញា ប៊ី សុធារី ដែលនាងចូលរួមប្រកួតប្រជែង ព្រោះចប់ពីនេះនាងមិនបន្តចូលរួមប្រកួតកម្មវិធីអ្វីផ្សេងឡើយ។
ប្រាប់ឱ្យដឹងបែបខ្លីខ្លឹមកាលពីពេលថ្មី សុធារី ថា នាងត្រៀមខ្លួនជាស្រេចហើយសម្រាប់ការប្រកួតប្រជែងដ៏អស្ចារ្យនេះ ដោយបានផ្លាស់ប្តូរខ្លួនឯងស្ទើរ ៣៦០ ដឺក្រេ ថែមទាំងហ៊ានលះបង់កែសម្ភស្សដើមទ្រូង ដើម្បីបង្កើតភាពស្រស់ស្អាត ទំនុកចិត្ត និងភាពជឿជាក់ឱ្យខ្លួនឯងទៀតផង។
កញ្ញា ប៊ី សុធារី មើលទៅមានទំនុកចិត្តខ្ពស់ និងជឿជាក់លើសមត្ថភាពថាអាចនឹងដណ្តើមមកុដថ្នាក់ជាតិ Miss Grand Cambodia 2024 ឆ្ពោះទៅការតំណាងកម្ពុជាលើឆាកអន្តរជាតិ។
ប៉ុន្តែ ពេលសួរនាំដល់ក្តីរំពឹងក្នុងការប្រកួតនេះ Miss Grand កំពង់ឆ្នាំង បែរជានិយាយថា នាងគ្មានក្តីរំពឹងអ្វីសម្រាប់ការប្រកួតបវរកញ្ញាលើកចុងក្រោយនេះឡើយ មានតែមហិច្ឆិតាដណ្តើមមកុដ Miss Grand Cambodia 2024 ឱ្យបាន។
Miss Grand កំពង់ឆ្នាំង សុំមិននិយាយអ្វីច្រើនជាងនេះឡើយ តែនាងចង់ឱ្យទស្សនិកជន និងបណ្តាអ្នកគាំទ្រទាំងអស់ តាមដានសកម្មភាពរបស់នាងក្នុងការប្រកួត Miss Grand Cambodia 2024 ដើម្បីបានដឹងថា នាងមានអ្វីថ្មីមក surprise ទាំងអស់គ្នា!
អត្ថបទ៖ រ៉ាត់ ចាន់ធីតា រូបភាព៖ ឃាង ទូច និងហ្វេសប៊ុក