បារីអេឡិចត្រូនិក  ឬ Vape ត្រូវបានប្រើប្រាស់ច្រើនក្នុងចំណោមយុវជនវ័យក្មេង ជាពិសេសសិស្សសាលា ហើយជាទូទៅពួកគេ ប្រើប្រាស់ បារីអេឡិចត្រូនិក ជា ក្រុម  ។ ការជក់ បារីអេឡិចត្រូនិក ជាក្រុម ឬ រួមគ្នានោះឯងហើយ ដែលជាការប្រឈមខ្លាំងនឹងការឆ្លងជំងឺកូវីដ១៩ ហើយការជក់ បារីអេឡិចត្រូនិក រួមគ្នា នេះទៀតសោត ក៏ត្រូវបានរកឃើញថា គឺជាមូលហេតុដ៏ចម្បងមួយជំរុញឱ្យពួកគេឈានទៅប្រើប្រាស់គ្រឿងញៀន  ។ នេះបើតាមការអះអាងរបស់ អង្គការ ចលនា ដើម្បី សុខភាព កម្ពុជា ហៅកាត់ថា CMH ។

កន្លងមក ស្ថាប័នជាតិ និង អន្តរជាតិដែលធ្វើការលើវិស័យសុខភាព សុទ្ធតែបានរកឃើញ និង អះអាងដូចៗគ្នាថា បារីអេឡិចត្រូនិក ឬ Vape មិនមែនជាម៉ាស៊ីន ឬ ឧបករណ៍ផ្តាច់បារីទេ វាថែមទាំងធ្វើឱ្យអ្នកប្រើប្រាស់ ក្លាយជាអ្នកញៀនបារីធម្មតា ២ ដងទៀតផង ។ ហេតុនោះ ស្ថាប័នទាំងនោះ បានហៅបារីអេឡចត្រូនិក ឬ Vape ថា គឺជាឧបាយកល របស់ឧស្សាហកម្មថ្នាំជក់តែប៉ុណ្ណោះ ។

ម្យ៉ាងទៀត អង្គការសុខភាពពិភពលោក ជាដើម បានអះអាងថា ការប្រើប្រាស់ បារីអេឡិចត្រូនិក បណ្តាលឱ្យគ្រោះថ្នាក់ធ្ងន់ធ្ងរដល់សួត ដូចបារីធម្មតាដែរ ខណៈមជ្ឈមណ្ឌលប្រយុទ្ធប្រឆាំងជំងឺ របស់សហរដ្ឋអាមេរិក  CDC អះអាងថា គិតត្រឹមពាក់កណ្ដាលខែ កុម្ភៈ ឆ្នាំ២០២០ ជំងឺសួតទាក់ទង់នឹងការប្រើ បារីអេឡិចត្រូនិក នៅសហរដ្ឋអាមេរិក មានប្រមាណ  ២៨០០ ករណី ក្នុងនោះស្លាប់ ៦៨ករណី ។

លោកវេជ្ជបណ្ឌិត មុំ គង់ នាយកប្រតិបត្តិ នៃ អង្គការ ចលនា ដើម្បី សុខភាពកម្ពុជា  CMH  ពន្យល់ថា ដោយសារតែការប្រើប្រាស់ បារីអេឡិចត្រូនិក  បង្កអោយគ្រោះថ្នាក់ធ្ងន់ធ្ងរដល់សួតបែបនេះ  ប្រសិនបើអ្នកប្រើប្រាស់ បារីអេឡិចត្រូវនិក ឆ្លងជំងឺកូវិដ១៩ មែននោះ គេនឹងប្រឈមនឹងគ្រោះថ្នាក់កាន់តែខ្ពស់  ។ 

សូមជម្របថា បារីអេឡិចត្រូនិក ឬ Vape ត្រូវបានអាជ្ញាធរជាតិប្រយុទ្ធប្រឆាំងគ្រឿងញៀន ហាមឃាត់មិនឱ្យលក់ និង ប្រើប្រាស់ឡើយតាំងពីឆ្នាំ ២០១៤ មកម៉្លេះ ដែលបានសេចក្តីថា បារីអេឡិចត្រូនិក គឺជាផលិតផលខុសច្បាប់ ។ ទោះយ៉ាងណា គេនៅតែឃើញមានការផ្សព្វផ្សាយលក់ បារីអេឡិចត្រូនិក ឬ Vape នៅលើបណ្ដាញសង្គមជាច្រើនដោយប្រើឈ្មោះថា  ម៉ាស៊ីន ឬ ឧបករណ៍ផ្ដាច់បារី  ។ 

លោកវេជ្ជបណ្ឌិត មុំ គង់ បានបន្ថែមថា ក្រោមហេតុផលដូចដែលបានលើកឡើងមកនេះជាដើម អាជ្ញាធរមានសមត្ថកិច្ចគប្បីរឹតបន្តឹងវិធានការហាមឃាត់ការលក់ និង ការប្រើប្រាស់ បារីអេឡិចត្រូនិក អោយបានហ្មត់ចង់ ដើម្បី ទប់ស្កាត់ការរីករាលដាលកូវីដ ១៩ ផង និង ក៏ជាវិធីបង្ការទប់ស្កាត់ការឈានទៅប្រើប្រាស់គ្រឿងញៀនផង ជាវិពិសេសក្នុងចំណោមសិស្សសាលាវ័យក្មេង៕

អត្ថបទ៖ ខឿន សាឃាង