នាយកដ្ឋានពាណិជ្ជកម្មអាមេរិក បានបង្ហាញថា សេដ្ឋកិច្ចអាមេរិក បានកើនឡើងក្នុងអត្រាប្រចាំឆ្នាំ ១,៦% នៅក្នុងត្រីមាសទី ១ ឆ្នាំ ២០២៤នេះ ថមថយល្បឿនច្រើន បើធៀបនឹងពេលដូចគ្នាកាលពីឆ្នាំមុន។ នេះបើយោងតាមការចេញផ្សាយដោយ សារព័ត៌មានអន្តរជាតិធំៗជាច្រើន។

បើប្រៀបធៀបទៅនឹងត្រីមាសទី ៤ ឆ្នាំ ២០២៣ ការថយចុះនៃផលិតផលក្នុងស្រុកសរុបពិតប្រាកដនៅក្នុងត្រីមាសទី ១ ឆ្នាំ ២០២៤ មូលហេតុជាចម្បង គឺការធ្លាក់ចុះនៃការចំណាយអ្នកប្រើប្រាស់ ការនាំចេញ និងការចំណាយរបស់រដ្ឋ និងក្នុងស្រុក ក៏ដូចជាការធ្លាក់ចុះនៃ ការចំណាយរបស់រដ្ឋាភិបាល។

ការប៉ាន់ប្រមាណផលិតផលក្នុងស្រុកសរុបរបស់អាមេរិក ដែលបានចេញផ្សាយថ្មីសម្រាប់ត្រីមាសទី ១ ដែលត្រូវបានគេហៅថាការប៉ាន់ប្រមាណជាមុន គឺផ្អែកលើទិន្នន័យប្រភពដែលមិនពេញលេញ និងអាចត្រូវបានត្រួតពិនិត្យបន្ថែមទៀតដោយ ភ្នាក់ងារប្រភព។

យ៉ាងណាមិញ ការប៉ាន់ប្រមាណលើកទី ២ សម្រាប់ត្រីមាសទី ១នេះ ដោយផ្អែកលើ ទិន្នន័យប្រភពពេញលេញបន្ថែមទៀត នឹងត្រូវបានចេញផ្សាយនៅថ្ងៃទី ៣០ ខែឧសភា។

ដោយឡែក អ្នកសេដ្ឋកិច្ចដែលត្រូវបានស្ទង់មតិដោយ Reuters បានព្យាករណ៍ថា GDP អាមេរិក កើនឡើងក្នុងអត្រា ២,៤% បន្ទាប់ពីកើនឡើងក្នុងអត្រា ៣,៤% នៅក្នុងត្រីមាសទី ៤ ឆ្នាំមុន។

ជាចុងក្រោយអ្នកសេដ្ឋកិច្ច បញ្ជាក់ថា សេដ្ឋកិច្ចអាមេរិក បានប្រឆាំងនឹងការព្យាករណ៍នៃវិបត្តិសេដ្ឋកិច្ច ចាប់តាំងពីចុងឆ្នាំ ២០២២ បន្ទាប់ពីយុទ្ធនាការដំឡើងអត្រាការប្រាក់ដ៏ខ្លាំងក្លារបស់ ធនាគារកណ្តាល ដើម្បីលុបបំបាត់អតិផរណា៕

អត្ថបទ៖ ងួន សុភ័ត្រ្តា រូបភាព៖ ឯកសារ