ក្រសួងពាណិជ្ជកម្មថៃ កំពុងជំរុញការលក់អង្ករ រវាងរដ្ឋាភិបាលនិងរដ្ឋាភិបាល ទៅកាន់ប្រទេសឥណ្ឌូណេស៊ី ខណៈពេល ខិតខំឈានទៅមុខជាមួយនឹង ផែនការក្នុងការចរចាការលក់ជាមួយប្រទេសចិនផងដែរ។ នេះបើយោងតាមការចេញផ្សាយ នៅថ្ងៃនេះដោយសារព័ត៌មានក្នុងស្រុកថៃ។

កាលពីចុងឆ្នាំ២០២៣ ក្នុងកិច្ចប្រជុំកំពូលជប៉ុន-អាស៊ាន ប្រទេសឥណ្ឌូនេស៊ី បានបង្ហាញពីចេតនារបស់ខ្លួនក្នុងការទិញអង្ករចំនួន ១លានតោនពីប្រទេសថៃ តាមរយៈកិច្ចព្រមព្រៀងរដ្ឋាភិបាលនិងរដ្ឋាភិបាល។

ស្តុកដំបូងដែលមានចំនួន ៥ម៉ឺន ៥ពាន់តោន ត្រូវបានលក់ទៅឱ្យ ប្រទេសឥណ្ឌូណេស៊ី ជាមួយនឹងការដឹកជញ្ជូន ត្រូវបានរំពឹងទុកថា ធ្វើឡើងនៅក្នុងខែនេះ។
ក្រសួងពាណិជ្ជកម្មថៃ បានបន្ថែមថា ខ្លួនកំពុងធ្វើការលើកិច្ចព្រមព្រៀងសម្រាប់ស្តុកនាំចេញទី ២។

រដ្ឋមន្ត្រីក្រសួងពាណិជ្ជកម្មថៃ លើកឡើងថា ក្រសួងកំពុងរង់ចាំលទ្ធផលនៃរយៈពេលចែកចាយអង្ករបន្ថែម ២៨ម៉ឺនតោន ក្រោមកិច្ចសន្យាជាមួយប្រទេសចិន។ក្រសួងក៏កំពុងធ្វើការលើកិច្ចព្រមព្រៀងរវាងរដ្ឋាភិបាលនិងរដ្ឋាភិបាល ជាមួយប្រទេសផ្សេងទៀតដែរ ប៉ុន្តែបានបដិសេធមិនបង្ហាញព័ត៌មានលម្អិត ដើម្បីការពារការបន្ថយតម្លៃដោយ ដៃគូប្រកួតប្រជែង។

កាលពីឆ្នាំមុន ប្រទេសថៃបាននាំចេញអង្ករចំនួន ៨លាន ៧សែនតោន ដែលជាកម្រិតខ្ពស់បំផុតក្នុងរយៈពេល ៥ឆ្នាំ។សូមជម្រាបថា ទីផ្សារនាំចេញអង្ករសំខាន់ៗរបស់ប្រទេសថៃ រួមមាន សហរដ្ឋអាមេរិក ចិន កាណាដា និងហុងកុង៕

អត្ថបទ៖ ងួន សុភ័ត្រ្តា រូបភាព៖ ឯកសារ