រដ្ឋាភិបាលប្រទេសបឺគីណាហ្វាហ្សូ (Burkina Faso) បានចេញមុខបដិសេធថាមិនមានការធ្វើរដ្ឋប្រហារនៅក្នុងប្រទេសរបស់ខ្លួននោះទេ បន្ទាប់ពីមានការផ្ទុះអាវុធនៅក្បែរវិមានប្រធានាធិបតី និងមានការបះបោរពីសំណាក់មហាជន។

គេស្ដាប់ឮសំឡេងផ្ទុះអាវុធយ៉ាងកងរំពង បន្ទាប់ពីពួកយោធាផ្ទុះការតវ៉ានៅតាមមូលដ្ឋានសឹកជាច្រើនកន្លែងទូទាំងប្រទេសបឺគីណាហ្វាហ្សូ ដើម្បីទាមទារឲ្យរុះរើមុខតំណែងមន្ត្រីកំពូលៗនៅក្នុងក្រសួងការពារជាតិ និងការទទួលបានសម្ភារៈសឹកកាន់តែសម្បូរបែប ដើម្បីប្រយុទ្ធប្រឆាំងនឹងពួកបះបោរឥស្លាមជ្រុលនិយម។

អ្នករស់នៅក្បែរវិមានប្រធានាធិបតីអះអាងថាពួកគេឃើញឧទ្ធម្ភាគចក្រ១គ្រឿងហោះក្រវែលទីនោះកាលពីយប់មិញ។ ការផ្ទុះអាវុធនេះក៏ធ្វើឲ្យមហាជនទូទៅព្រួយបារម្ភថាអាចនឹងមានរដ្ឋប្រហារសាជាថ្មីនៅក្នុងប្រទេសអាហ្វ្រិកខាងលិច១នេះ ដែលជានិច្ចកាលងាយនឹងធ្លាក់ទៅក្នុងដៃរបស់ពួកយោធា។

ទន្ទឹមនឹងនោះ ពួកបាតុករបានដុតទីស្នាក់ការរបស់គណបក្សកាន់អំណាច។ ទោះជាយ៉ាងណាក្ដី រដ្ឋាភិបាលបឺគីណាហ្វាហ្សូចេញមុខបដិសេធជាហូរហែថាគ្មានអំពើរដ្ឋប្រហារយោធាទេ, ហើយក៏បដិសេធមិនធ្វើតាមការទាមទាររបស់ពួកទាហានបះបោរផងដែរ។

នៅក្នុងសេចក្ដីថ្លែងការណ៍របស់ខ្លួន១ អ្នកនាំពាក្យក្រុមកងទ័ពបះបោរបានទាមទារចំណុច១ចំនួន ដូចជាដូរតំណែងមេទាហានជាន់ខ្ពស់ដែលពួកគេមិនពេញចិត្ត, រដ្ឋាភិបាលគួរយកចិត្តទុកដាក់ចំពោះកងទ័ពដែលត្រូវរបួស និងឧបត្ថម្ភគាំទ្រដល់ក្រុមគ្រួសារយោធិនដែលពលីនៅក្នុងសមរភូមិ។ សូមជម្រាបថាអំពើបះបោរនេះកើតឡើងជាង១អាទិត្យក្រោយពេលដែលមនុស្ស១២នាក់ត្រូវចាប់ខ្លួនពីបទសង្ស័យថាបានរៀបចំផែនការបង្កអស្ថិរភាពនៅប្រទេសបឺគីណាហ្វាហ្សូ៕

ប្រែសម្រួល៖ អន សំអាង